У Беларусі выпрабоўваюць расійскі перахопнік дронаў «Молат»
У пачатку лютага ў краіне стартавалі тэсты 59 розных сістэм барацьбы з дронамі. У выпрабаваннях задзейнічаны сродкі выяўлення, падаўлення і знішчэння БПЛА. Паводле звестак Міністэрства абароны Беларусі, больш за 80% прадстаўленых узораў — беларускай вытворчасці. А сярод замежных распрацовак да выпрабаванняў дапушчаны расійскі комплекс «Молат» ад кампаніі Nova Labs, піша выданне «Мілітарний».
Беларускі вайсковец выпрабоўвае расійскі перахопнік дронаў «Молат». Люты 2026 года. Фота: Мінабароны Беларусі
Што ўяўляе сабой «Молат»
Комплекс складаецца з дзвюх частак: шматразовай пускавой устаноўкі і беспілотніка-перахопніка.
Пускавая прылада выкананая ў выглядзе трубы з рукаяткамі, прыкладам і прыцэлам. Даўжыня ў баявым становішчы — каля 70—80 см, маса — некалькі кілаграмаў.
Расійскі перахопнік дронаў «Молат» кампаніі Nova Labs
Сам перахопнік — гэта невялікі БПЛА ў цыліндрычным корпусе з інфрачырвонай галоўкай саманавядзення. Унутры размешчаныя сістэмы кіравання, акумулятар і баявая частка. Стартавая маса — да 1,5—2 кг. Дрон узлятае вертыкальна, можа завісаць і рухацца гарызантальна.
Расійскі перахопнік дронаў «Молат» кампаніі Nova Labs
Максімальная хуткасць палёту — да 50 м/с. Далёкасць дзеяння залежыць ад тыпу цэлі:
- буйныя БПЛА самалётнага тыпу — да 1 км,
- коптары дыяметрам 500—700 мм — 350—400 м,
- працоўная вышыня — да 200 м.
Для знішчэння цэлі выкарыстоўваецца фугасная баявая частка масай каля 500 г. Магчымы падрыў пры кантакце або пры пралёце побач з цэллю. Таксама прадугледжанае кінетычнае перахопліванне — прамое траплянне.
Від з расійскага перахопніка дронаў «Молат» кампаніі Nova Labs
Абноўленая версія
Вытворца заяўляе, што новая мадыфікацыя здольная знішчаць цэлі на вышыні да 2 км пры хуткасці да 200 км/г. Комплекс прапануецца ў пераносным і стацыянарным варыянтах.
Пераносная версія мае цеплавізійную сістэму навядзення і боепрыпасы калібру 100 мм з хуткасцю да 265 км/г.
Стацыянарны варыянт абсталёўваецца радыёкамандным або лазерным навядзеннем, мае далёкасць да 3,5 км і хуткасць снарада да 360 км/г.
Чытайце таксама:
У Беларусі распрацавалі новы ўдарны беспілотнік