Людзі спяць з тазікамі: у цэнтры Мінска затапіла цэлы жылы дом
Камунальнікі змогуць вырашыць праблему толькі вясной.
Фота: Tochka.by
Старадаўні дом у самым цэнтры Мінска насупраць Вялікага тэатра. Тут сваё «Лебядзінае возера». Вадаспады ліюцца з даху. Некаторыя жыхары спяць з тазікамі, а хтосьці і зусім пераехаў — у сырасці немагчыма знаходзіцца, піша «Точка».
У доме на вуліцы Максіма Багдановіча высокія столі, тоўстыя сцены і добры від з акна. Толькі вось перакрыцці даху — слабае месца амаль векавога будынка.
Дах пачаў працякаць яшчэ ў сярэдзіне студзеня. Вада сцякае патокам у пад’ездзе і ў кватэрах.
Жыхары звярталіся і ў службу 115, і на гарачую лінію Мінгарвыканкама, і нават у Камітэт дзяржаўнага кантролю.
Таццяна Генадзьеўна з мужам заслалі плёнку на ложак і падставілі тазік. Спяць на адной палове ложка. А на кухні сужэнцы выставілі ўсю тару, што змаглі знайсці ў гаспадарцы.
Фота: Tochka.by
Іх суседка перасяліла ўнучку з дзіцячага пакоя: там ад сырасці адклеіліся шпалеры.
Самая жаласная сітуацыя — на верхнім трэцім паверсе. Наталля Пятроўна прыязджае дадому толькі памяняць вёдры. Сцены вымаклі наскрозь. З-за сырасці цяжка знаходзіцца ў пакоі.
Жанчына сабрала рэчы і з’ехала жыць да родных. Яе маральны стан прыгнечаны.
Адказ камунальных службаў
Падтоплены дом знаходзіцца на балансе ЖЭУ №3 Цэнтральнага раёна. Пра праблему там ведаюць.
«Амаль кожны дзень па гэтым адрасе працуюць альпіністы — чысцяць снег, збіваюць лёд», — расказала Tochka.by супрацоўніца ЖЭУ.
Аднак дзеянні альпіністаў толькі мінімізуюць заліццё. Маразы так-сяк дапамогуць — часова запламбуюць цечу.
Капітальны рамонт дома запланаваны на 2027 год. Але камунальнікі абяцаюць выканаць бягучы рамонт даху раней — перакрыцці ўзмоцняць вясной.