Які памер пінжака правільны? Гід для мужчын
Ідэальна пасаджаны касцюм заўсёды выглядае выйгрышна. Але розніца паміж элегантнасцю і неахайнасцю часта вымяраецца літаральна міліметрамі. Як вызначыць, ці сапраўды ваш пінжак сядзіць бездакорна?
Выданне The Wall Street Journal раіць, на што звярнуць увагу.
1. Плечы — аснова ўсяго
Калі вы купляеце гатовы касцюм, найперш звярніце ўвагу на плечы: шво павінна заканчвацца амаль дакладна на краі вашага пляча. Дапускаецца адхіленне ў межах паўсантыметра — сантыметра, калі вы хочаце больш расслаблены сілуэт.
Звярніце ўвагу і на каўнер. Паміж каўняром кашулі і пінжака не павінна быць зазору. Таксама дрэнна, калі тканіна ўтварае складкі ззаду каля шыі. Пінжак павінен акуратна яе аблягаць.
2. Грудзі
Другі важны момант — аб’ём.
Пінжак павінен зашпільвацца свабодна. Калі ў зашпіленым выглядзе вы бачыце нават лёгкае «нацяжэнне» тканіны, лепш не купляйце.
Калі ж паміж жыватом і зашпіленым пінжаком свабодна змяшчаюцца як мінімум тры пальцы, яго можна смела браць.
Яшчэ адзін сігнал, што памер малы, — складкі пад пахамі пры зашпіленым пінжаку.
Калі мадэль крыху велікаватая, яе звычайна можна падагнаць. Але калі вы літаральна «патанаеце» ў пінжаку, лепш узяць меншы памер. Варта памятаць агульнае правіла: ушыць адзенне прасцей, чым пашырыць — лішнюю тканіну немагчыма «дадаць».
3. Рукавы
Па словах спецыялістаў, ідэальная даўжыня рукава — пытанне густу, але ў межах разумнага.
Класічны варыянт: рукаў заканчваецца на мяжы паміж кісцю і запясцем.
Некаторыя аддаюць перавагу крыху даўжэйшаму рукаву, каб пры згінанні рукі ён не падсоўваўся занадта высока. Іншыя, наадварот, выбіраюць карацейшы, каб падкрэсліць гадзіннік ці бранзалет.
Падкараціць рукаво звычайна нескладана і адносна нядорага. Часам яго можна і трохі падоўжыць — калі ўнутры манжэты ёсць запас тканіны. Але варта праверыць, ці з’яўляюцца прарэзы для гузікаў на рукаве функцыянальнымі. Калі яны дэкаратыўныя, падганяць прасцей. Калі функцыянальныя — работа будзе больш складанай.
І важная дэталь: з-пад рукава пінжака павінна выглядаць манжэта кашулі. Класічная норма — каля 0,5—1 сантыметра. Можна крыху больш, але не настолькі, каб была відаць уся манжэта.
4. Даўжыня пінжака
Даўжыня таксама залежыць ад стылю, але існуе просты арыенцір. Калі рукі апушчаныя ўздоўж цела, ніжні край пінжака павінен знаходзіцца прыкладна паміж першым і другім суставамі вялікага пальца. Гэта забяспечвае збалансаваныя прапорцыі і не скарачае візуальна росту.
5. Складка на штанах ля абутку
Акрамя непасрэдна пінжака варта звярнуць увагу на другі элемент касцюма — штаны. Тут важны выгляд месца судакранання калашыны і абутку.
Калі тканіна ледзь дакранаецца да верхняй часткі туфля і ўтварае невялікую складку, гэта лічыцца найбольш універсальным і бяспройгрышным варыянтам.
Можна выбраць і больш доўгія штаны, якія дадуць больш выразную складку, асабліва калі крой шырэйшы. Гэта стварае больш традыцыйны, класічны сілуэт. Калі ж вы носіце боты, дадатковая даўжыня дасць «невялікі запас», каб край калашыны акуратна ляжаў на наску абутку.
Спецыялісты падкрэсліваюць: менавіта ўвага да дэталяў дазваляе не проста надзець касцюм, а выглядаць у ім бездакорна.