Пасольства ў Іране рэкамендуе беларусам самастойна з'ехаць з краіны
З-за закрытай паветранай прасторы вылет з краіны цяпер немагчымы, таму выязджаць варта ці ў Арменію, ці ў Азербайджан.
Fatemeh Bahrami / Anadolu via Getty Images
Пасольства Беларусі ў Тэгеране рэкамендавала грамадзянам, якія знаходзяцца ў Іране, самастойна пакінуць краіну на фоне працяглых ваенных дзеянняў.
У пасольстве заклікалі беларусаў захоўваць спакой, выконваць асцярожнасць і пазбягаць месцаў масавага збору людзей.
Таксама дыпламаты раяць не набліжацца да ваенных і дзяржаўных аб’ектаў, не фатаграфаваць і не здымаць іх на відэа, а пры неабходнасці хавацца ў сховішчах або на ніжніх узроўнях падземных паркінгаў.
З-за закрытай паветранай прасторы вылет з краіны цяпер немагчымы. У сувязі з гэтым грамадзянам Беларусі настойліва рэкамендуюць скарыстацца даступнымі наземнымі маршрутамі і самастойна выехаць з Ірана ў Арменію або Азербайджан.
У дыпмісіі адзначылі, што найбольш зручны маршрут праходзіць праз пункт пропуску «Нурдуз — Агарак» на мяжы з Арменіяй. Для выезду праз Азербайджан неабходна загадзя атрымаць індывідуальны дазвол.