У Кіеве завяршыў працу беларускі «Пункт нязломнасці»
У Кіеве закончыў працу беларускі «Пункт нязломнасці» — валанцёрская палатка, якая амаль два месяцы дапамагала людзям сагрэцца і атрымаць ежу. Пра гэта паведаміла кіраўніца валанцёрскай ініцыятывы «Сустрэча» Алена Жаркевіч.
Фота: facebook.com/alena.zarkevic.2025
За час працы дапамогу ў беларускім «Пункце нязломнасці» атрымалі сотні людзей. Але гэта месца, як сцвярджае Алена Жаркевіч, было не толькі пра ежу і цяпло. Тут беларусы шмат размаўлялі з украінцамі пра Беларусь — пра рэпрэсіі, пра людзей, якія вымушаны з’язджаць з краіны, пра мігрантаў і пра вялікі ўплыў Расіі. Таксама яны расказвалі, што беларусы працягваюць змагацца і падтрымліваць адзін аднаго.
Алена падзякавала ўсім, хто дапамагаў і падтрымліваў працу пункта. Паводле яе слоў, дзякуючы агульным намаганням маленькая палатка змагла зрабіць значна больш, чым можна было чакаць. Хоць «Пункт нязломнасці» цяпер закрываецца, валанцёрская дзейнасць працягнецца і далей.