На кніжную выставу ў Мінск прыязджала Дар'я Данцова
На сустрэчы яна адзначыла, што беларусы не задалі ёй ніводнага непрыемнага пытання.
Фота тут і далей: sb.by
На Мінскай міжнароднай кніжнай выставе-кірмашы прайшла творчая сустрэча з расійскай пісьменніцай Дар'яй Данцовай. На выставу Данцова прыехала ўпершыню.
Дэтэктывы Данцовай (яна паспела напісаць больш за 280) лічацца бульварнай літаратурай. Але яна застаецца папулярнай пісьменніцай у Расіі, прададзена звыш 200 мільёнаў экзэмпляраў яе кніг.
На сустрэчы яна адзначыла, што беларусы не задалі ёй ніводнага непрыемнага пытання, піша sb.by.
«Ведаю, што цяпер у вас Год беларускай жанчыны. Дык вось, не магу не адзначыць, але еду па вуліцы і бачу, што ў вас прыгожыя жанчыны. Такое не ў кожным горадзе і краіне сустрэнеш. А яшчэ смачныя прадукты. Напярэдадні пакаштавала беларускі зефір. І павінна сказаць, у нас такога няма. Дадому вярнуся з лішнімі кілаграмамі», — падзялілася пісьменніца.
Данцовай 73 гады, але яна працягвае пісаць кнігі — кожны дзень.
«Саджуся за стол з 6:00 і раней да 14:00, у залежнасці ад таго, што па графіку. Я адпачываю, калі пішу, таму не ўспрымаю пісьменніцтва як працу. У нядзелю хаджу ў храм. Па аўторках яшчэ чытаю лекцыі семінарыстам, потым — лекцыі для анкахворых (Данцова калісьці сама перанесла рак малочнай залозы. — НН). Лічу, што для любімай справы заўсёды можна знайсці месца і час. Сама прыдумляю сюжэты, ніякага ШІ!»