Віцебскі праўладны блогер прапануе выдаваць інтэрнэт па даведках
На яго думку, інтэрнэт — гэта ваенная распрацоўка Пентагона, якую ў сучасных умовах трэба кантраляваць праз спецыяльныя дазволы, хоць сам аўтар актыўна карыстаецца сацсеткамі для прасоўвання сваіх ідэй.
Настаўнік гісторыі і супрацоўнік Віцебскага раённага краязнаўчага музея Андрэй Кулябкін у сваім канале напісаў наступнае:
«У цяперашніх умовах новай сусветнай капіталістычнай вайны інтэрнэт стаў тым, чым першапачаткова задумваўся — ЗБРОЯЙ. Яго так і задумалі ў 1969 годзе ў Пентагоне як сувязь на выпадак ядзернай вайны, гэта значыць з ваеннай мэтай. Так, зброя спецыфічная, але зброя. Інтэрнэт павінен быць па даведках. І будзе».
Як піша канал «Віцебская вясна», які і заўважыў допіс, тэлеграм-канал аўтара называецца «Андрей Кулябкин. Видный отечественный блоггер». Гэты рэсурс мае ўсяго 152 падпісчыкі. Не нашмат болей (211 падпісчыкаў) і ў Іnstagram-акаўнце, які называецца таксама з прытэнзіяй на шматзначнасць — «indoevropeysky».
Кулябкіна мясцовыя ўлады выкарыстоўваюць, калі трэба прасоўваць ідэалагічную павестку.