Дзевяцігадовая школьніца аддала аферыстам ювелірныя каштоўнасці мамы. Яе палохалі дзіцячым домам
Дзяўчынцы ў месенджары патэлефанавалі нібыта ад імя дамафоннай фірмы, і яна паведаміла ім асабістыя даныя.
Пасля гэтага школьніцы патэлефанавалі ілжэміліцыянеры і, пагражаючы адправіць яе ў дзіцячы дом, а маці прыцягнуць да крымінальнай адказнасці, прымусілі выканаць патрабаванні, паведамляе прэс-служба МУС.
Спалохаўшыся, дзяўчынка ўзяла з сейфа ўсе ювелірныя вырабы (на 5 тысяч даляраў) і пакінула іх на вуліцы ў дамоўленым месцы, адкуль забраў кур’ер.
Маці дзяўчынкі звярнулася ў міліцыю, тая затрымала 34‑гадовага мінчука, які павінен быў перадаць ювелірныя вырабы аферыстам, але не паспеў.
Ювелірныя вырабы будуць вернуты ўладальніцы.