Памежны камітэт паказаў пашпарты, з якімі беларусаў разварочвалі на мяжы
Больш за 160 праблемных дакументаў паказалі на мяжы з пачатку года, паведаміў Дзяржаўны памежны камітэт.
Ведамства нават прадэманстравала прыклады старонак беларускіх пашпартоў, з якімі людзей не прапусцілі праз мяжу. 80 замежнікаў спрабавалі ўехаць у Беларусь без візы.
Яшчэ 33 чалавекі паказалі пашпарты з пашкоджанымі фотаздымкамі або размытымі пячаткамі органаў, што выдалі дакумент. У чатырох беларусаў пашпарты знаходзіліся ў базе несапраўдных дакументаў.
Акрамя таго, двое замежнікаў спрабавалі перасекчы мяжу па падробленым і чужым дакуменце. Больш за 30 грамадзян Беларусі і іншых краін прад’явілі пратэрмінаваныя пашпарты. Часцей за ўсё гэта адбывалася з-за таго, што людзі не замянілі дакументы пасля змены прозвішча.
У Threads у ДПК пачалі пытацца, які дакумент «не першай свежасці» дакладна пройдзе кантроль — каб разумець.
— Галоўнае, каб усе рэквізіты дакумента былі ў парадку (пячаткі, штампы, дадзеныя), а калі, напрыклад, старонка надарваная, то ўжо трэба мяняць, — падказалі ў ведамстве. Пагранічнікі таксама дадалі, што пашкоджаныя дакументы на мяжы канфіскуюцца, таму паспрабаваць прайсці з імі яшчэ раз, спадзеючыся на разуменне іншага супрацоўніка, не атрымаецца.