Беларускае тэлебачанне пакажа велікодныя каталіцкія набажэнствы
Беларускія каталікі змогуць паглядзець велікодныя набажэнствы па тэлебачанні 4 і 5 красавіка.
Здымак ілюстрацыйны. Фота: «Наша Ніва»
4 красавіка ўвечары па каналах «Беларусь 1» і «Беларусь 24» а 23:20 пакажуць Пасхальную вігілію — галоўную літургію года ў каталікоў. Яна будзе праходзіць у мінскім архікафедральным касцёле Найсвяцейшай Панны Марыі, а службу ўзначаліць мітрапаліт Іосіф Станеўскі.
Таксама ў гэты ж дзень а 21:00 каналы «Беларусь 4 Віцебск» і «Віцебск» будуць трансляваць вігілію з касцёла Святога Казіміра ў Лепелі.
Пасхальная вігілія — гэта цэнтральнае богаслужэнне Вялікай суботы. Яна пачынаецца з літургіі святла, калі асвячаюць агонь і вялікую свечку (Пасхал), што сімвалізуе Хрыста. Затым гучыць старажытны гімн пра ўваскрэсенне, пасля чаго ідзе літургія хрышчэння з асвячэннем вады.
5 красавіка а 08:40 на канале «Беларусь 1» будзе паказана святочнае віншаванне з Вялікаднем ад мітрапаліта Іосіфа Станеўскага.
А 16:20 на «Беларусь 3» можна будзе паглядзець трансляцыю з Ватыкана — велікоднае пасланне і дабраславенне Папы Рымскага «Гораду і свету».
Чытайце таксама:
Стаў вядомы расклад літургій на Вялікдзень у беларускіх супольнасцях Польшчы
Беларусаў Вільні і Варшавы запрашаюць на велікодныя канцэрты
Каталіцкі арцыбіскуп Станеўскі наведаў канцэрт да «Дня яднання народаў Беларусі і Расіі»