Падчас футбольнага матча здарыўся пажар. Гулец узяў шланг і патушыў яго
Незвычайная сітуацыя адбылася ў трэцім дывізіёне чэмпіянату Швейцарыі па футболе 4 красавіка.
Побач з полем клуба «Парадыза» ўспыхнуў пажар. У ролі выратавальніка нечакана выступіў адзін з футбалістаў. На яго імгненна адрэагаваў 36‑гадовы капітан мясцовай каманды Эзэкіль Скелота. Ён узяў шланг з вадой, падбег да краю поля і пачаў тушыць агонь.
Перамогу ў матчы атрымаў «Парадыза» — 2:1. Скелота правёў на полі ўсю гульню. Што праўда, клуб займае перадапошні радок у чэмпіянаце і можа вылецець у ніжэйшы дывізіён.
Эзэкіль нарадзіўся ў 1989 годзе ў Буэнас-Айрэсе, але, як і папярэдні папа, Францішак, мае італьянскія карані і нават выклікаўся ў зборную Італіі.
У свой час правёў некалькі матчаў за міланскі «Інтэр», гуляў за «Аталанту», «К'ева», «Сасуола», партугальскі «Спортынг» і англійскі «Брайтан».