75‑гадовы святар перабягаў васьміпалосную трасу пад Мінскам — і загінуў пад коламі «Фальксвагена»

Протаіерэй Уладзімір Бадзюлькін вырашыў не спускацца ў падземны пераход, які знаходзіўся літаральна за некалькі метраў ад месца трагедыі.

Уладзімір Бадзюлькін. Фота: molod-eparchy.by

Адбылося ўсё ўвечары 21 красавіка на 23‑м кіламетры дарогі Р-1 «Мінск — Дзяржынск». 75‑гадовы святар не стаў спускацца ў падземны пешаходны пераход, які быў побач, а паспрабаваў перасекчы трасу Р-1 з боку Фаніпаля (у раёне аўтобуснага прыпынку) у бок вёскі Чэчына. У гэтым месцы за кошт паласы разгону траса становіцца ажно васьміпалоснай.

Месца здарэння. Злева відаць кут агароджы падземнага пераходу. Фота: dzr.by

Уладзіміра збіла 25‑гадовая мінчанка, якая на «Фольксваген Гольф 6» ехала ў бок сталіцы.

Дзяржынскі раённы аддзел Следчага камітэта распачаў крымінальную справу па ч. 2 арт. 317 КК (парушэнне правіл дарожнага руху, якое пацягнула па неасцярожнасці смерць чалавека. Максімальна магчымае пакаранне для кіроўцы — 5 гадоў хіміі. Але гэта ў выпадку, калі дзяўчыну прызнаюць вінаватай).

Уладзімір Бадзюлькін нарадзіўся ў Светлагорску. Скончыў Мінскую духоўную семінарыю. Быў жанаты, у яго дзве дачкі.

У 1990 годзе стаў спачатку дыяканам.

З 1990 па 1992 год служыў у кліры прыхода храма міраносіцы роўнаапостальнай Марыі Магдаліны горада Мінска, у 1992‑1994 гадах быў настаяцелем прыхода храма Нараджэння Прасвятой Багародзіцы ў сяле Сяргеевічы Пухавіцкага раёна Мінскай вобласці.

У 1994 годзе Уладзіміра накіравалі на служэнне ў Фаніпаль. Там ён заснаваў і пабудаваў храм Ушэсця Гасподняга.

У 2006 годзе Бадзюлькін быў узведзены ў сан протаіерэя. З 2014 года стаў клірыкам новастворанай Маладзечанскай епархіі.

Сёлета ў студзені Уладзімір па стане здароўя фактычна пайшоў на пенсію — стаў заштатным клірыкам Маладзечанскай епархіі.

Развіталіся з ім 23 красавіка — у тым самым храме ў Фаніпалі, які Уладзімір заснаваў.

Храм Ушэсця Гасподняга пабудаваны ў 2000 годзе. Яго настаяцелем два з паловай дзесяцігоддзі быў Уладзімір Бадзюлькін

Каментары да артыкула