Сілавікі сцвярджаюць, што затрымалі двух мужчын за галасаванне на выбарах у КР. Але ці можна гэтаму верыць?
Іх юрыдычны статус невядомы.
Сілавікі паказалі дваіх мужчын, якіх затрымалі нібыта за галасаванне на выбарах у КР. Скрыншоты відэа палепшаны нейрасеткай
З 11 па 17 мая праходзяць анлайн-выбары ў Каардынацыйную раду. На гэты момант прагаласавала 838 чалавек.
Тэлеграм-канал, звязаны з сілавікамі, апублікаваў два відэа на 10‑15 секунд з мужчынамі, якія, як сцвярджаецца, галасавалі ў КР. Яны расказваюць, як перайшлі па спасылцы і трапілі на сайт галасавання.
Як удалося ідэнтыфікаваць «Нашай Ніве», адзін з мужчын — 34‑гадовы Андрэй Пятакоў з Мінска.
Андрэй Пятакоў. Фота: сацсеткі
Другі — 38‑гадовы Аляксандр Медушэўскі. Магчыма, апошнім часам ён жыў у Літве.
Аляксандр Медушэўскі. Фота: сацсеткі
Як іх затрымалі (і ці затрымалі ўвогуле), які ў іх юрыдычны статус — не вядома нічога.
Ці галасавалі гэтыя мужчыны наогул і як на іх выйшлі сілавікі? Таксама незразумела.
Можа быць рэальнай любая сітуацыя.
І тое, што яны насамрэч перайшлі па сапраўднай спасылцы галасавання, але не ўключалі VPN, і сілавікі здолелі адсачыць актыўнасць.
І тое, што яны пераходзілі па нейкай фэйкавай спасылцы, якую сілавікі маглі раскідваць па чатах.
І тое, што іх затрымалі за нешта іншае — напрыклад, пры праверцы на мяжы знайшлі «экстрэмісцкія» падпіскі, — але папрасілі агучыць падрыхтаваны тэкст пра галасаванне.
Сілавікі пагражалі завядзеннем крымінальнай справы за «садзейнічанне экстрэмісцкай дзейнасці» і тым, хто балатуецца ў КР, і тым, хто галасуе.