«Абанемент на спакойнае жыццё ануляваны». Камандуючы Сіламі БПЛА Украіны пракаментаваў налёт на Маскву і зноў прыгразіў Лукашэнку
«Юстас — Алексу Рыгоравічу» — Броўдзі зноў у абразлівай форме звярнуўся да Лукашэнкі.
Фота беспілотніка, які апублікаваў Роберт Броўдзі
Камандуючы Сіламі беспілотных сістэм Украіны Роберт Броўдзі, вядомы пад пазыўным «Мадзяр», пракаментаваў маштабную атаку БПЛА на Маскву і Падмаскоўе, якая адбылася раніцай 17 мая, і звярнуўся да беларускага кіраўніцтва.
Броўдзі назваў атаку і цяперашнія магчымасці Украіны «версіяй 17.05».
Ён заявіў, што «шансы зраўняліся» — ад гэтага дня для расійскай сталіцы «скасаваны аднабаковы абанемент на спакойнае жыццё на Патрыках [элітны раён Масквы] і ў наваколлі».
«Масква цяпер ніколі не спіць», — паздзекаваўся ён.
Броўдзі зноў у абразлівай форме звярнуўся да Лукашэнкі. «Юстас — Алексу Рыгоравічу: важна, як увайсці ў патрэбную размову, але яшчэ важнейшае мастацтва выхаду з яе. Лукашэску, прыглядвайся да перспектыў», — напісаў ён.
Броўдзі зноў перайначыў прозвішча Лукашэнкі на Лукашэску — аналогія з Нікалае Чаўшэску, дыктатарам Румыніі, якога расстралялі ў выніку народнага паўстання 1989 года.
Гэтыя заявы былі зроблены на фоне нядаўніх слоў прэзідэнта Украіны Уладзіміра Зяленскага ад 15 мая, што Масква актыўна спрабуе ўцягнуць Мінск у вайну і зноў выкарыстаць тэрыторыю Беларусі для правядзення сваіх наступальных ваенных аперацый.
Пост Броўдзі з'яўляецца прамым папярэджаннем, што ў выпадку паўторнай агрэсіі з беларускага кірунку адказ аналагічнымі сродкамі чакае і аб'екты ў Беларусі.
Учора камандуючы Сіламі беспілотных сістэм Украіны таксама выступіў з беспрэцэдэнтнымі пагрозамі на адрас Лукашэнкі, якога назваў «гаўляйтарам».
«Мінскі гаўляйтар Лукашэску! Мы фіксуем пралёт кожнага асобнага шахеда, які, скарыстаўшыся калідорамі Беларусі, накіроўваецца ва Украіну, кожную тваю фрыкцыю і хістанне мілітарнага адцення…
Ты можаш колькі хочаш круціць вусы на камеру і хлусіць свайму застрашанаму народу пра «нейтралітэт», але твае канцавіны ўжо па самыя плечы ў крывавай юшцы забойстваў мірных украінцаў.
Трэк наступны: калідор для забойцаў = саўдзел = каса», — напісаў Броўдзі.