«Вось яшчэ такі сюрпрыз». Мядзведзя заўважылі за 25 кіламетраў ад Мінска
Беларуска апублікавала ў Threads відэа нечаканай сустрэчы. У кадры — мядзведзь, які паводзіць сябе спакойна і не заўважае людзей побач. Аўтарка кажа, што ўсё адбываецца ўсяго за 25 кіламетраў ад Мінска, піша Onliner.by.
У каментарыях да допісу Карына ўдакладніла, што лакацыя знаходзіцца ў Мядзельскім напрамку, паміж вёскамі Сады і Чэрнікі. «Я, канешне, хацела ўбачыць мядзведзя на волі, але дзесьці ў 200 кіламетрах ад участка, а не ў 500 метрах», — напісала мінчанка.
Дзяўчына расказала, што відэа з мядзведзем ёй даслала суседка па хутары ў панядзелак. За кадрам чуваць, як жанчына аклікае мядзведзя, каб той падняў галаву — у першыя секунды жывёлу лёгка пераблытаць з дзіком. Ролік здымаўся з машыны.
— Калі мы куплялі ўчастак, нам казалі, што побач паляўнічыя ўгоддзі і што кожны год у гэтым раёне бачаць мядзведзяў. Летась, напрыклад, заўважылі ў Лысовічах — гэта прыкладна за 15 кіламетраў ад нас. Але на гэты раз — занадта блізка, мы крыху шакаваныя. Спадзяюся, што мядзведзі палахлівыя, галоўнае — каб не шалёныя. Пакуль не страшна, галоўнае — не выпускаць нашага сабаку, каб не ўцёк і нічога не здарылася. Мы таксама адправілі відэа іншай суседцы — у яе маленькія дзеці і гаспадарка, вырашылі папярэдзіць і яе.
Дарэчы, нядаўна на сваім участку Карына заўважыла сляды, падобныя да ваўчыных. А вось да гасцей накшталт казуль, аленяў і ласёў, запэўнівае дзяўчына, яны ўжо прызвычаіліся.