У МНС расказалі, што натварыла непагадзь па ўсёй Беларусі

Прэс-служба МНС паведаміла, што падраздзяленні ведамства ліквідуюць наступствы непагадзі па ўсёй Беларусі. Ратавальнікі дапамагаюць распілоўваць і прыбіраць паваленыя дрэвы, якія ўпалі з-за моцнага ветру і дажджоў.

Дуб, які ўпаў на трасу Бабруйск — Магілёў. Фота: БелТА

У Мінскай вобласці зафіксавана 13 выездаў МНС у розных раёнах, уключаючы Бярэзінскі, Валожынскі, Капыльскі, Мінскі, Мядзельскі, Нясвіжскі, Смалявіцкі раёны, а таксама горад Жодзіна. У Жодзіне паваленае дрэва пашкодзіла легкавы аўтамабіль.

У Віцебскай вобласці ратавальнікі 11 разоў выязджалі на прыборку дрэў ва Ушацкім, Гарадоцкім, Расонскім, Аршанскім, Полацкім раёнах і ў горадзе Віцебску. У Чашніках пашкоджаны дах шматкватэрнага дома.

У Магілёўскай вобласці было 17 выездаў, падчас якіх прыбралі каля 20 паваленых дрэў. У Магілёве таксама здымалі металічныя канструкцыі з казырка будынка.

У Гродзенскай вобласці зафіксаваны тры выпадкі дапамогі па распілоўцы дрэў у Мастоўскім і Астравецкім раёнах, а таксама ў самім Гродне.

Паводле папярэдніх звестак, пацярпелых няма.

Каментары да артыкула