Як зарэгістраваць ката ў Беларусі: пакрокавая інструкцыя
Незалежна ад таго, ці выходзіць ваш кот з кватэры на вуліцу, ці ён узорны дамасед, хатняга гадаванца ўсё роўна трэба рэгістраваць. Гэта не зойме шмат часу, затое абароніць ад штрафу. Плаціць падатак за катоў у адрозненне ад сабак не трэба.
Паводле даных на 1 красавіка 2026-га, у Мінску зарэгістравана 1468 котак, з іх 360 — у I квартале гэтага года. Для параўнання: прыкладна такую ж колькасць катоў зарэгістравалі ў сталіцы за ўвесь 2025 год.
Times.by склаў пакрокавую інструкцыю, як «прапісаць» ката, і даведаўся ў эксперта, як сярод гадаванцаў будуць выяўляць «нелегалаў».
Як праходзіць рэгістрацыя
Катоў і сабак афармляюць у службе «адно акно» па месцы жыхарства або рэгістрацыі ўладальніка. Гэта трэба зрабіць на працягу трох дзён пасля таго, як дарослы кот у вас з'явіўся. Калі гэта кацяня, то яго трэба зарэгістраваць ва ўзросце ад 3 да 3,5 месяца.
Чацвер, на гадзінніку амаль 19:00, у службе «адно акно» адміністрацыі Заводскага раёна некалькі чалавек запаўняюць бланкі заяў на рэгістрацыю катоў. Фармуляры ляжаць на стойцы — і новыя наведвальнікі бяруць адзін для сябе. У дакуменце трэба ўказаць пароду ката, мянушку, афарбоўку, дату нараджэння і прыбыцця ў дом, а таксама стэрылізаваны гадаванец ці не.
Times.by
Удакладнім, што з пашпартам у «адно акно» звяртаецца ўладальнік ката. Аднак калі ў кватэры жывуць некалькі ўласнікаў, то для рэгістрацыі гадаванца патрэбна пісьмовая згода кожнага паўналетняга ўладальніка жылля. Калі вы здымаеце кватэру, то ў гэтым выпадку прынясіце з сабой пісьмовую згоду арэндадаўцы. Прыходзіць асабіста ні яму, ні ўсім уладальнікам кватэры не трэба.
Тым часам перадаем заяву на рэгістрацыю ката спецыялісту службы «адно акно» — афармленне займае пару хвілін. У адказ выдаюць правілы ўтрымання хатніх жывёл і ўдакладняюць, выслаць пасведчанне і жэтон ката па пошце ці ж можам забраць іх самі.
Фота: Times.by
У другім выпадку на нумар тэлефона ўладальніка гадаванца прыйдзе смс, калі ўсё будзе гатова. У нашай сітуацыі гэта заняло тры дні: увечары ў чацвер падалі заяву, а ў панядзелак забралі металічны жэтон і пасведчанне ката.
Навошта рэгістраваць катоў
«Рэгістрацыя жывёл — не толькі абавязак уладальнікаў, але і адзін са спосабаў ацаніць, як развіваць інфраструктуру», — кажа Алена Бандарук, начальнік аддзела землеўпарадкавання і капітальнага рамонту дваровай тэрыторыі дзяржаўнага аб'яднання «Мінская гарадская жыллёвая гаспадарка».
Пасля рэгістрацыі ўладальніку кошкі выдаюць жэтон. Ён павінен быць у гадаванца на нашыйніку — калі кот прападзе ці выпрыгне з акна (што асабліва актуальна ў цёплы час года), гэта паскорыць пошук гаспадароў.
Спецыяліст нагадвае: заканадаўства не дапускае выпускаць жывёл з кватэры без суправаджэння ўладальнікаў, таксама гадаванцаў нельга пакідаць адных у грамадскіх месцах, нават калі яны на прывязі.
Што будзе, калі ката не зарэгістраваць
Адсутнасць рэгістрацыі лічыцца парушэннем правілаў утрымання хатніх сабак, котак, а таксама адлову безнаглядных жывёл. Згодна з арт. 16.30 КаАП за гэта можа пагражаць штраф ад 1 да 15 базавых велічынь (45—675 рублёў).
Прычым патрабаванні заканадаўства, па якіх сабакі і коткі павінны быць зарэгістраваны, дзейнічаюць з 2001 года.
Як будуць адсочваць наяўнасць рэгістрацыі ў катоў
Схаваць тое, што дома жыве кот без рэгістрацыі, не атрымаецца.
Інфармацыю пра гэта ў адміністрацыю раёна могуць перадаць камунальныя службы і ветэрынарныя клінікі. Таксама гэта можа стаць вядома падчас планавых рэйдаў камунальных службаў з прадстаўнікамі РУУС.
Як зняць ката з рэгістрацыі
Калі вы пераязджаеце ці кот прапаў альбо памёр, гадаванца трэба зняць з уліку ў той жа службе «адно акно», дзе яго рэгістравалі. Таксама пра гэта трэба паведаміць вашай тэрытарыяльнай ветэрынарнай станцыі.
Па новым месцы жыхарства на працягу трох дзён пасля пераезду ката зноў трэба зарэгістраваць.
У выпадку смерці жывёлы яе труп крэміруюць, і займаюцца гэтым спецыялізаваныя арганізацыі, напрыклад дзяржаўнае прадпрыемства «Фаўна горада». Крэмацыя можа быць агульнай (з іншымі жывёламі) ці індывідуальнай, калі вам аддадуць прах гадаванца ў памятнай урне.
Скідваць трупы жывёл у рэкі і азёры, балоты, закопваць іх у лесе ці пакідаць у кантэйнерах для збору адкідаў забаронена.