У Беларусі забаранілі прадаваць некаторыя рэчы Reserved, Cropp, Sinsay
У спісе — 44 пазіцыі адзення і абутку.
Цэлы спіс адзення пад брэндамі Reserved, Sinsay і Cropp забаранілі прадаваць у Беларусі. Тавары трапілі ў пералік небяспечнай прадукцыі Дзяржстандарту.
У спісе — 44 пазіцыі адзення і абутку. Усе рэчы вырабленыя польскай кампаніяй LPP S.A. Імпарцёрам у Беларусі выступае ТАА «Эл Пі Пі Блр».
Усе тавары не прайшлі праверку бяспекі, перш за ўсё паводле складу і паказчыка «гіграскапічнасць».
Апошні, напрыклад, для спадніцы Reserved для дзяўчынак пры норме не менш за 7% склаў 1,3%, а для піжамы Cropp пры норме не менш за 6% — толькі 0,9%.
Забарона на ўвоз і продаж уступіць у сілу з 30 мая.