У акупаваным Севастопалі цалкам знік бензін
Сухапутная дарога ў Крым цяпер цалкам прастрэльваецца ўкраінскімі дронамі, таму падвозіць паліва з кожным днём цяжэй.
Севастопаль. Фота: wikimedia.org
На запраўках Севастопаля няма бензіну марак АІ-92 і АІ-95. Гэта прызнаў губернатар горада Міхаіл Разважаеў. «Захоўваюцца лагістычныя складанасці, прычыны якіх вядомыя», — напісаў ён, не ўдакладніўшы, што мае на ўвазе.
Паводле яго слоў, улады робяць «усё магчымае», каб нармалізаваць сітуацыю ў найкарацейшыя тэрміны, а пытанні паставак паліва ў Крым кантралююць расійскія Мінэнерга і Мінтранс.
Дызельнае паліва пакуль ёсць, але не на ўсіх станцыях.
Праблемы з палівам у Севастопалі цягнуцца не першы тыдзень. Яшчэ 22 мая ўлады горада ўвялі ліміт на продаж — не больш за 20 літраў бензіну або дызеля ў адны рукі, каб пазбегнуць ажыятажу і чэргаў на запраўках.
Фармулёўку пра «лагістычныя складанасці, прычыны якіх вядомыя» Развожаеў выкарыстоўвае наўмысна расплывіста — не называючы прама ўдары па расійскай паліўнай інфраструктуры. Між тым украінскія сілы наносілі ўдары па Феадасійскай нафтабазе і па паромнай лагістыцы ў Керчы, а так званы сухапутны калідор у Крым праз акупаваныя тэрыторыі поўдня Украіны трапіў пад агнявы кантроль. Праз Крымскі мост цыстэрны з палівам з меркаванняў бяспекі не пускаюць, таму дастаўка залежыць ад паромаў і надвор'я.