Банкаўскія карткі могуць не працаваць у ноч на чацвер
У ноч на 4 чэрвеня ў Беларусі могуць назірацца часовыя збоі ў працы банкаўскіх картак, паведамілі ў Банкаўскім працэсінгавым цэнтры.
Фота: Lookby.Media
Планавыя тэхнічныя работы запланаваны на перыяд з 00:50 да 06:30 4 чэрвеня. У гэты час спецыялісты будуць праводзіць абслугоўванне абсталявання сеткі перадачы даных.
У названы прамежак часу магчымыя кароткачасовыя перапынкі ў абслугоўванні:
- трымальнікаў банкаўскіх картак;
- гандлёвых і сэрвісных арганізацый;
- пунктаў выдачы наяўных грошай;
- банкаматаў і прылад самаабслугоўвання.
Збоі могуць закрануць банкі, падключаныя да апаратна-праграмнага комплексу Банкаўскі працэсінгавы цэнтр.