На продаж выстаўлены модны бізнэс-цэнтр D16 — той, каля якога з зямлі вырастае рука. Цана ўражвае
У 2020 годзе корпус па адрасе Даўгабродская, 16, дзе раней размяшчаліся цэх выпрабаванняў і праектнае бюро Мінскага завода аўтаматычных ліній, на аўкцыёне набыў бізнэсмен Аляксей Карагін — уладальнік ювелірных сетак «7 Карат», Diamante і «Золотов».
Фота: Real.by
У 2023‑м годзе Карагін расказваў, што будынак былога завода прывабіў яго найперш высокімі столямі: на першым паверсе іх вышыня дасягае шасці метраў, на астатніх — чатырох з паловай. Аднак галоўным аргументам стаў кошт.
Аляксей Карагін. 2023 год. Фота: Onliner.by
Дакладную суму пакупкі бізнэсмен не называў, але адзначаў, што ў рэканструкцыю было ўкладзена прыкладна ў пяць разоў больш сродкаў.
Фота: Real.by
Прадпрымальнік захаваў гістарычны хол і парадную лесвіцу, але значна змяніў інтэр'ер. Столь аформілі беларускія дызайнеры, унутраны двор упрыгожылі графіці, а вакол будынка паклалі тратуарную плітку «Стары горад», даражэйшую за звычайную. Перад уваходам з'явіўся і незвычайны арт-аб'ект — чалавечая рука, якая нібыта вырастае з зямлі і трымае чырвоны клён.
Фота: onliner.by
Новы бізнэс-цэнтр атрымаў назву D16 і пачаў працу ў 2023 годзе. Частку трэцяга паверха заняла кампанія самога Карагіна, астатнія памяшканні здалі ў арэнду. Тады бізнэсмен сцвярджаў, што знайсці арандатараў удалося даволі хутка.
Фота: Real.by
Аднак неўзабаве ўласнік вырашыў развітацца з аб'ектам. Яшчэ ў канцы 2024 года D16 упершыню з'явіўся на рынку нерухомасці. Тады за бізнес-цэнтр прасілі больш за $10,34 мільёна.
Фота: Real.by
Цяпер аб'ект зноў выстаўлены на продаж. Як паведамляецца на сайце realt.by, новаму ўладальніку прапануюць шматфункцыянальны бізнэс-цэнтр агульнай плошчай 5170 квадратных метраў. У аб'яве ён пазіцыянуецца як гатовая бізнэс-платформа, якая можа выкарыстоўвацца як для ўласных патрэб кампаніі, так і для атрымання арэнднага даходу.
Фота: Real.by
Будынак складаецца з чатырох паверхаў і цокальнага ўзроўню. Сярод яго асаблівасцяў адзначаюцца высокія столі, панарамныя вокны памерам паўтара на тры метры, больш за дзесяць асобных уваходаў і магчымасць лёгкай адаптацыі памяшканняў пад розныя віды дзейнасці — офісы, крамы, шоўрумы, сферу паслуг, кавярні або рэстараны.
Фота: Real.by
У апісанні таксама згадваюцца асноўная і рэзервовая лініі электразабеспячэння, сістэма прытокава-выцяжной вентыляцыі, валаконна-аптычная сувязь, сучаснае асвятленне, санвузлы на кожным паверсе і асобная зона для харчавання супрацоўнікаў.
Фота: Real.by
На тэрыторыі ёсць закрыты ўнутраны двор і наземная паркоўка. Прадавец падкрэслівае, што будынак не патрабуе дадатковых укладанняў і ўжо цалкам гатовы да эксплуатацыі. У аб'яве таксама адзначаецца, што пакупніку не давядзецца аплачваць паслугі рыэлтарскай арганізацыі.
Фота: Real.by
Цікава, што ў параўнанні з канцом 2024 года заяўленая цана аб'екта істотна знізілася. Цяпер бізнэс-цэнтр ацэньваецца прыкладна ў $9 мільёнаў.