«Плакаў вельмі, казаў, што яго ўсе пазнаюць»: падпалкоўнік-участковы дабіўся, каб яго былую жонку судзілі
Участковы інспектар Бараўлянскага аддзела міліцыі Мінскага РУУС Аляксей Губіч напісаў заяву на былую жонку. Сілавік паскардзіўся на разгалошванне яго персанальных дадзеных.
Анжаліка Вараб'ёва і Аляксей Губіч
На старонцы Анжалікі Вараб’ёвай у Threads разгортваецца сапраўдны серыял. Жанчына распавядае ці то драму, ці то камедыю — як закахалася ў сілавіка і думала, што будзе за ім як за каменнай сцяной. Але ж аказалася, што падпалкоўнік — мамчын сынок, які бесперапынку перапісваецца з мамай і старэйшай сястрой.
Анжаліка апісвае, як яе свякроў (да яе маладзёны павінны былі ездзіць на лецішча дапамагаць з рамонтам) прыходзіла ў пакой да пары зранку і пачынала цалаваць свайго сына, які ляжаў у ложку з жонкай.
Апошняй спробай захаваць шлюб стала сумесная паездка ў санаторый. Жанчына спадзявалася «склеіць тое, што трэснула». Але ж і там сілавік увесь час дасылаў маці і сястры справаздачы. Анжаліка вярнулася з рашэннем падаць на развод — але нечакана высветлілася, што яна цяжарная.
У выніку шлюб нічым добрым не скончыўся. Сёлета ў студзені пара пайшла ў суд афармляць развод, апісвае былая жонка. Цяпер Анжаліка абвінавачвае Аляксея ў шмат чым: ад таго, што ён выносіў службовыя дакументы з працы, да хатняга гвалту.
Жанчына сцвярджае, што шмат гадоў сілавік здзекаваўся з жонкі і дачок, старэйшае дзіця (гэта дачка Анжалікі ад першага шлюбу) давёў да спробы суіцыду: «Калі хапаў мяне за горла, я казала: «Бі!». Ён казаў: «Я знішчу цябе так, у мяне сувязі і пагоны».
Адбылося, з яе словаў, ужо некалькі судоў. Анжаліка піша, што яе былы муж прайграў усе працэсы і цяпер абавязан сплаціць ёй 15 400 рублёў — але просіць у суда растэрміноўку на два гады.
Анжаліка з дзецьмі
Трэба адзначыць, што раней кар'ера Аляксея ішла ўгору. Па інфармацыі ад Belpol, да 2018 года Губіч працаваў у Дэпартаменце выканання пакаранняў і галоўным упраўленні ўнутраных спраў Мінскага гарвыканкама.
У 2020 годзе (тады пара пазнаёмілася) мужчына быў падпалкоўнікам у цэнтральным апараце МУС, працаваў ва ўпраўленні міжнароднага супрацоўніцтва старшым інспектарам па асаблівых даручэннях.
Яшчэ ў 2024 годзе Губіч сядзеў на ідэалагічнай лекцыі для кіраўніцтва і супрацоўнікаў падраздзяленняў цэнтральнага апарата і цэнтральнага падпарадкавання Міністэрства ўнутраных спраў — слухаў пра Саюзную дзяржаву.
А летась ён лятаў па працоўных пытаннях у В'етнам.
Аляксей Губіч у В'етнаме (крайні злева), 2025 год
Але нешта ў кар’еры Аляксея зламалася — яго панізілі і адправілі працаваць участковым.
Анжаліка сцвярджае, што ўсё гэта праз яе намаганні. Жанчына дайшла да міністра ўнутраных спраў — пасля чаго Губіч атрымаў строгае дысцыплінарнае спагнанне і быў паніжаны на службе.
Участковы Аляксей Губіч, сакавік 2026 года. Фота: comfort-life.by
Сілавік жа на сваю нечаканую папулярнасць у сацсетках пакрыўдзіўся. Анжаліка распавядала, што чатыры гадзіны правяла ў пастарунку — аказваецца, былы муж напісаў на яе заяву за разгалошванне асабістых звестак.
Цяпер жа яна паведаміла, што адбыўся суд: Анжаліку аштрафавалі на 5 базавых (гэта 225 рублёў). Кажа, што былы муж «плакаў вельмі, казаў, што яго ўсе пазнаюць».
Жанчына лічыць, што нічога не парушыла, бо артыкул з імем, прозвішчам і пасадай яе былога ўжо апублікавала газета «Прысталічча». Плюс да таго, імя і прозвішча ўчастковага змешчаныя на розных стэндах.