У Бабруйску шматдзетную маці асудзілі на вялікі тэрмін па наркатычным артыкуле
Спроба 33‑гадовай жыхаркі Бабруйска, якая гадуе чатырох дзяцей, хутка падзарабіць скончылася трагедыяй для яе сям'і. За згоду працаваць закладчыцай на наркамаркет жанчына атрымала суровы прысуд. Хоць у яе нічога і не атрымалася.
Як высветліла следства, бабруйчанка знайшла прапанову аб працаўладкаванні ў тэлеграме, дзе ёй паабяцалі лёгкі заробак за распаўсюд псіхатропаў. Для верыфікацыі і афармлення жанчына адправіла свайму «куратару» фатаграфію пашпарта, пасля чаго прайшла інструктаж. Яе першае заданне правалілася, бо яна проста не змагла знайсці пакунак з наркотыкамі ў пазначаным месцы.
Другое ж заданне жанчына выканаць ужо не паспела. За працу па новых каардынатах ёй абяцалі заплаціць 60—70 долараў. Па дарозе да схованкі яе затрымалі супрацоўнікі міліцыі. У выніку ператрусу праваахоўнікі канфіскавалі з тайніка 2,25 грама забароненага рэчыва.
Суд Бабруйска палічыў доказы віны пераканаўчымі і прызнаў жанчыну вінаватай па чацвёртай частцы артыкула 328 Крымінальнага кодэкса Рэспублікі Беларусь і прысудзіў 8 гадоў ва ўмовах агульнага рэжыму. Прысуд яшчэ не ўступіў у законную сілу.