65‑гадовага гамельчука асудзілі за спробу дыверсіі на чыгунцы і здраду дзяржаве. Што вядома?
Сяргея Стасенку судзілі адразу па пяці цяжкіх артыкулах Крымінальнага кодэкса. Яму пагражала да дваццаці гадоў калоніі.
Сяргей Стасенка. Фота: Belpol. Ілюстрацыйная выява згенераваная з дапамогай ШІ
Сяргею Стасенку 65 гадоў. Ён з вёскі Лагуны Добрушскага раёна. Гэта невялікая вёска на мяжы з Расіяй і блізка да ўкраінскай мяжы. Побач праходзіць чыгунка ў бок украінскага горада Гарадня і размяшчаецца вайсковы аэрадром.
Па звестках Belpol, раней мужчына кіраваў кампаніяй «Белаўтаматыкасэрвіс», якая рэмантуе вымяральныя прыборы, але звольніўся адтуль у 2014 годзе. Пазней Сяргей кіраваў праектнай арганізацыяй «Рэмкатлапраект» і меў уласную кампанію «ТэрмаСтайл», якая займалася ізаляцыйнымі работамі.
З 2018 года працаваў страхавым агентам «Белдзяржстраха» па Гомельскім раёне.
Апошнім часам, магчыма, Сяргей працаваў у Расіі — ён меў там рахункі і адрас.
Апошні раз Стасенка быў анлайн у лістападзе 2025 года — тады ён уступіў у суполку пра дарожную абстаноўку ў Гомелі. Неўзабаве пасля гэтага яго арыштавалі.
Судзілі мужчыну ў Гомельскім абласным судзе за цэлы шэраг нібыта незавершаных злачынстваў, бо ўсе абвінавачванні ідуць праз артыкул за замах. У спісе — замах на стварэнне экстрэмісцкага фармавання, спроба дзяржаўнай здрады, незаконнае абыходжанне са зброяй, а таксама замахі на акт тэрарызму і наўмыснае прывядзенне ў непрыдатнасць рэек.
Улічваючы, што ўсё гэта адбывалася вакол вёскі Лагуны, якая знаходзіцца недалёка ад мяжы і важнай транспартнай інфраструктуры, верагодна, гаворка ідзе пра чарговую справу рэйкавага партызана.
Дакладны тэрмін зняволення невядомы, але мужчыну пагражала да 20 гадоў калоніі.