Украінскія дроны з ШІ аўтаномна збіваюць «шахеды»: іх пусцілі ў серыю
Міністр абароны Украіны Міхаіл Фёдараў апублікаваў відэа працы перахопнікаў новага пакалення на базе штучнага інтэлекту (ШІ), якія ўжо выпускаюцца і выкарыстоўваюцца.
Тэхналогія паспяхова прайшла баявыя выпрабаванні на Харкаўшчыне і аўтаматызуе 95% усяго працэсу абароны неба, паведаміў Фёдараў.
Паводле яго слоў, праект прайшоў шлях ад прататыпа да фронту менш чым за год.
Сёння сістэма працуе наступным чынам.
Аўтаматычны запуск і навядзенне — сістэма самастойна паднімае дрон у паветра, вядзе яго па маршруце, распазнае і наводзіцца на варожы камікадзэ. Аператар жа ў рэальным часе бачыць рух аб'ектаў, выбірае прыярытэтную цэль і дае фінальную каманду на знішчэнне.
Такая аўтаномнасць дазваляе сістэме СПА імгненна рэагаваць на масавыя налёты, эфектыўна абараняць гарады і закрываць неба з дапамогай уласных высокіх тэхналогій, заяўляюць распрацоўшчыкі.