«Украіна не прайграе, Расія не перамагае». Эн Эплбаум пра пералом у вайне, які мяняе ўсё
Нават ва ўмовах спынення дапамогі з боку ЗША, украінцы змаглі радыкальна змяніць дынаміку баявых дзеянняў. Пра гэта спасылаючыся на нядаўнія сустрэчы з вайскоўцамі і чыноўнікамі ў Кіеве піша вядомая амерыканская журналістка Эн Эплбаум. У часопісе The Atlantic яна апублікавала матэрыял з красамоўным загалоўкам «Ukraine Is Not Losing. Russia Is Not Winning» («Украіна не прайграе. Расія не перамагае»).
Фота: Dmytro Smolienko / Ukrinform / NurPhoto via Getty Images
Эн Эплбаум вылучае тры асноўныя тэатры ваенных дзеянняў, дзе расійскі наратыў пра тое, што Расія перамагае, цалкам пацярпеў крах.
Сухапутны фронт. «Мёртвая зона» шырынёй 30 кіламетраў
Насуперак стэрэатыпам пра павольнае прасоўванне расійскіх войскаў, з пачатку вясны 2026 года, падчас свайго наступлення, Расія страціла ва Украіне больш тэрыторыі, чым захапіла.
Эплбаум тлумачыць, што фронт ператварыўся ў празрыстую зону, якая цалкам кантралюецца дронамі і штучным інтэлектам.
Лінія фронту стала шэрай 30‑кіламетровай зонай у шырыню, дзе ўсё ўнутры гэтай зоны бачна дронам. Гэта азначае, што любы расійскі грузавік, танк ці вайсковец імгненна ідэнтыфікуецца і па ім лёгка нанесці ўдар.
Гэта дазваляе Украіне штомесяц ліквідоўваць і раніць да 30 тысяч расійскіх салдат. Кіеў блізкі да сваёй мэты — знішчаць больш акупантаў, чым Расія здольная мабілізаваць на замену, піша аўтарка.
Вайна на далёкіх дыстанцыях. Калапс расійскай СПА і нафтавы крызіс
Пуцін працягвае тэрарызаваць украінскія гарады балістычнымі ракетамі, карыстаючыся дэфіцытам снарадаў для сістэм Patriot.
Аднак Крэмль замоўчвае, што ў самой Расіі катастрафічна заканчваюцца сродкі СПА.
Гэта дазволіла ўкраінскім дронам сістэмна выбіваць расійскую нафтагазавую інфраструктуру ў глыбокім тыле. Паводле экспертаў, нафтаперапрацоўчыя магутнасці Расіі ўжо скарочаны мінімум на 20%, а амаль усе буйныя НПЗ у цэнтральнай частцы краіны спынілі або істотна зменшылі вытворчасць. Гэта ўжо стварыла сур'ёзны крызіс з палівам на акупаваным Крымскім паўвостраве.
Псіхалагічная вайна
Упэўненасць Масквы ў хуткай перамозе канчаткова разбурана. Эплбаум прыводзіць два прыклады псіхалагічнага злому расійскага грамадства: скарочаны вайсковы парад у Маскве з-за боязі ўкраінскіх дронаў і чорны дым над нафтабазай у Санкт-Пецярбургу проста ў дзень адкрыцця міжнароднага эканамічнага форуму.
Кіраўнік Офіса прэзідэнта Украіны Кірыл Буданаў (экс-кіраўнік ГУР) адзначыў у каментары журналістцы:
«Яны [расіяне] не могуць зразумець, чаму яны павінны працягваць ваяваць і чаму па іх цяпер б'юць, бо ім казалі, што яны перамогуць, а Украіна — гэта нішто».
Эплбаум спасылаецца на сакрэтныя дакументы, якія прасачыліся з офіса высокапастаўленага крамлёўскага чыноўніка Сяргея Кірыенкі.
У іх распісаны план таго, як улады збіраюцца «прадаць» расійскаму грамадству канец вайны: абвясціць перамогу і назваць армію РФ «самай баяздольнай у свеце»; падаць мінімальныя тэрытарыяльныя набыткі як каласальны поспех; заявіць, што Еўропа атрымала незваротны эканамічны ўдар, а Украіна вось-вось разваліцца.
Паводле слоў Буданава, менавіта дзеля таго, каб пакінуць у краіне толькі адну афіцыйную пазіцыю падчас гэтага развароту, Крэмль загадзя заблакаваў Telegram на тэрыторыі Расіі. На яго думку, перамовы, пачатыя адміністрацыяй Трампа, могуць прывесці да спынення агню па існуючай лініі фронту ўжо ў гэтым годзе. Нягледзячы на тое, што Уладзімір Зяленскі накіраваў Пуціну ліст з прапановай прамых перамоў, расійскі дыктатар пакуль публічна адмовіўся ад сустрэчы.
Нават калі баявыя дзеянні зацягнуцца, Эплбаум прагназуе стварэнне новага статус-кво. Па меры развіцця тэхналогій «празрыстая зона» на фронце пашырыцца з 30 да 50—65 кіламетраў.
У выніку лінія фронту ператварыцца ў фактычную дэмілітарызаваную зону, падобную да той, што аддзяляе Паўночную і Паўднёвую Карэю, якая патрулюецца беспілотнікамі.
Гэта стане часовай мяжой, якую ніхто не прызнае, але якую будзе немагчыма зрушыць.
Для Украіны гэта не будзе абсалютнай перамогай, але стане галоўным паражэннем Пуціна, бо яго ключавая мэта — сцерці Украіну з карты свету — так і не была дасягнутая.