Легендарны дуб Робіна Гуда ў Шэрвудскім лесе загінуў
Але не ад старасці, кажуць эксперты.
Так дуб выглядаў раней. Фота: Paul Buckingham / wikipedia
Дуб рос у Шэрвудскім лесе ў Нотынгемшыры каля 1200 гадоў. Гэта адно з самых старажытных і вялікіх дрэў у краіне. У апошнія гады, нягледзячы на намаганні ахоўнікаў прыроды, волат пачаў чахнуць, піша BBC.
Гэтай вясной на ім упершыню не з’явілася лісця, і Каралеўскае таварыства абароны птушак (RSPB) — прыродаахоўная арганізацыя, якая кіруе лесам — паведаміла, што Вялікі дуб загінуў.
Фота: PA
Дакладную прычыну вызначыць складана. Таварыства заявіла, што тут супала мноства фактараў, з якіх асноўныя — «структурнае ўмяшанне з добрых намераў і занадта шмат чалавечай актыўнасці», звязанай з дрэвам. Наступствы змянення клімату, уключаючы нядаўнія хвалі спёкі і засухі, узмацнілі праблемы, з якімі дрэва непазбежна сутыкаецца ў такім узросце.
Мёртвы дуб застанецца стаяць на сваім месцы «як манумент людзям і дзікай прыродзе», заявіла арганізацыя. Акрамя таго, па ўсім свеце высаджаны яго саджанцы.
Легенда кажа, што разбойнік Робін Гуд выкарыстоўваў дупло Вялікага дуба — гэтая адтуліна ўтварылася з-за грыбкоў — у якасці сховішча.
У дуба было шмат розных назваў, а «Дуб маёра» замацавалася пасля таго, як дрэва было згадана ў кнізе маёра Хеймана Рука, якая выйшла ў 1790 годзе. Былы салдат брытанскай арміі пасля дэмабілізацыі жыў у некалькіх мілях ад Шэрвудскага лесу.