На пажары ў Нароўлі загінулі двое малых дзяцей мясцовага ўчастковага
Радамір і Мілена былі ў гасцях у прабабулі, калі ў доме пачаўся пажар. Жанчына таксама загінула.
Аляксей Полаз. Фота: narovlya.by
Міністэрства ўнутраных спраў выказала спачуванні старшаму ўчастковаму Нараўлянскага РАУС капітану Аляксею Полазу ў сувязі са смерцю дваіх яго дзяцей — 10‑гадовага Радаміра і 5‑гадовай Мілены.
Бяда здарылася 14 чэрвеня. Тады адбыўся пажар на вуліцы Сацыялістычнай у Нароўлі. Загінулі 73‑гадовая жанчына і двое яе праўнукаў.
Аляксею Полазу 37 гадоў, ён нарадзіўся ў Мазыры. Пасля службы ў войску працаваў па кантракце ў калоніі №20 для рэцыдывістаў у Мазыры. Ажаніўся са студэнткай медыцынскага каледжа ў Нароўлі Таццянай Яроменка і перавёўся ў Нароўлю бліжэй да яе. Спачатку служыў у атрадзе аховы тэрыторый радыеактыўнага забруджвання, а пасля стаў участковым.
Аляксей Полаз адказвае за ўсе вёскі Нараўлянскага раёна, а 33‑гадовая Таццяна Полаз працуе старшай медсястрой у тэрапеўтычным аддзяленні раённай бальніцы і вучыцца на факультэце псіхалогіі і педагогікі Гомельскага дзяржаўнага ўніверсітэта.
Таццяна Полаз. Фота: narovlya.by