Лідар «Драздоў» заявіў, што чакае афіцыйных выбачэнняў ад гомельскай раёнкі
Пасля паспяховага канцэрта гэтага папулярнага беларускамоўнага гурта на афіцыйным Дні Незалежнасці ў Гомелі рэдактарка газеты «Маяк» Вікторыя Футрына выступіла з меркаваннем, якое ідзе насуперак «палітыцы партыі».
Скрыншот відэа гурта
Адказваючы на ўласнае пытанне «ці можна дараваць здраднікам», яна заявіла: «давяраць таму, хто аднойчы здрадзіў, я б ужо не стала». Таксама яна выказала сумневы, што ў «Драздаў» хопіць смеласці «стаць на абарону Радзімы», заўважыў «Флагшток».
Лідар гурта Віталь Карпанаў пасля чарговага канцэрта, які прайшоў 11 ліпеня ў Маладзечне, апублікаваў відэа з песняй «Хатай бацькоў» і размясціў на сваіх старонках у сацыяльных сетках пост з мяккай рэакцыяй, імкнучыся прадэманстраваць канструктыўны падыход:
«Мне даслалі ролік, дзе адно з дзяржаўных СМІ чарговы раз назвало гурт «Дразды» здраднікамі… Тым часам на канцэрт гэтых «здраднікаў» сёння прыйшло 2700 гледачоў! Калегі, калі вы перастанеце жыць у паралельнай рэальнасці? Пакуль мы чакаем афіцыйных выбачэнняў ад гэтага СМІ, паглядзіце, як любяць гэтых хлопцаў простыя беларусы!»
У каментарыях калектыў масава падтрымалі. Напрыклад, адзін з карыстальнікаў пакінуў такі водгук: «Гурт «Дразды» — самы лепшы гурт у Беларусі, які нясе ў масы любоў да нашай беларускай мовы і любоў да нашай Радзімы, сінявокай Беларусі. Учора была на канцэрце — гэта проста незабыўна. А хто піша пра іх брыдоты, тыя самі здраднікі і хлусы. Поспехаў хлопцам і дзякуй за любоў да нашай Радзімы, да людзей».
На раніцу 13 ліпеня рэдактарка гомельскай раённай газеты не выдаліла і не адрэдагавала сваю «калонку» на сайце «Маяка».