У Белаграпрамбанка перастаў працаваць на айфонах мабільны дадатак

У Белаграпрамбанку часова перастаў працаваць мабільны дадатак на прыладах Apple — iPhone і iPad, паведаміла прэс-служба ўстановы.

Фота ілюстрацыйнае

У банку паведамілі, што ўваход у дадатак недаступны праз знешнія абмежаванні. Пры гэтым кліентаў запэўнілі, што рызыкі страты грошай або персанальных даных няма, а доступ старонніх асоб да рахункаў выключаны.

Пакуль праблема не вырашаная, кліентам рэкамендуюць карыстацца інтэрнэт-банкінгам для аплаты, пераводаў і іншых аперацый. Для зручнасці спасылку на яго можна дадаць на галоўны экран прылады праз браўзер.

У банку заявілі, што працуюць над альтэрнатыўнымі тэхнічнымі рашэннямі, каб аднавіць зручны доступ да банкаўскіх паслуг для карыстальнікаў iOS.

Прычына збою пакуль не паведамляецца. Раней у беларускіх банкаў таксама ўзнікалі падобныя праблемы: у некаторых выпадках мабільныя дадаткі былі недаступныя або выдаляліся з App Store, але з часам установы знаходзілі спосабы аднавіць працу сэрвісаў.

Каментары да артыкула