Мінскае «Дынама» перамагло «Нефтчы» ў кваліфікацыі Лігі канферэнцый, хоць прайгравала 0:2
Мінскае футбольнае «Дынама» з валявой перамогі пачало выступленне ў другім кваліфікацыйным раўндзе Лігі канферэнцый, абыграўшы ў першым матчы азербайджанскі «Нефтчы» з лікам 4:2.
Карэн Варданян зрабіў у гэтым матчы дубль
Сустрэча адбылася 22 ліпеня ў Баку. Пачатак матча склаўся для мінчукоў вельмі няўдала. Ужо на 2‑й хвіліне гаспадароў наперад вывеў Эмін Махмудаў, а на 8‑й хвіліне пасля аўтагола Аляксандра Сялявы лік стаў 2:0 на карысць «Нефтчы».
Аднак яшчэ да перапынку «Дынама» здолела скараціць адставанне. На 36‑й хвіліне вызначыўся Карэн Варданян.
Адразу пасля перапынку мінчукі зраўнялі лік: на 47‑й хвіліне гол забіў Яўген Малашэвіч. Яшчэ праз дзесяць хвілін Варданян аформіў дубль і вывеў «Дынама» наперад. Канчатковы вынік на 77‑й хвіліне ўстанавіў Гулжыгіт Алыкулаў.
У выніку мінскае «Дынама» атрымала валявую перамогу з лікам 4:2, адыграўшы два мячы пасля няўдалага старту сустрэчы.
Матч у адказ паміж камандамі адбудзецца 30 ліпеня ў Балгарыі, на намінальна хатнім для «Дынама» полі.
Чытайце таксама:
Міжнародная асацыяцыя спартыўнай прэсы назвала дзесяць найлепшых футбалістаў чэмпіянату свету
У беларускі клуб пераходзіць гуляць адзін з удзельнікаў нядаўняга мундыялю
Сталі вядомыя магчымыя супернікі беларускіх клубаў у трэцім раўндзе Лігі канферэнцый