Мінчанка прывезла ў чамадане з Занзібара гекона і шукае яму новы дом
Беларуска вярнулася з адпачынку на Занзібары і падчас распакоўкі рэчаў выявіла ў сваім чамадане нечаканы сувенір — маленькага гекона.
Дзяўчына апублікавала фота малога турыста ў Threads і падзялілася гісторыяй: «Зляталі на Занзібар. Вярнуліся дадому. Разбіраем чамадан — а адтуль выходзіць ГЕКОН. То-бок мы куплялі квіткі, праходзілі пашпартны кантроль, ляцелі некалькі гадзін… а гэты таварыш проста абраў тарыф «багаж». Цяпер тэрмінова шукаем, куды ўладкаваць нашага нелегальнага турыста, бо беларускі клімат відавочна не ўваходзіў у яго планы».
Паводле слоў аўтаркі, у гатэлі такія яшчаркі спрытна бегалі па сценах і лавілі камароў.
У каментарыях карыстальнікі пачалі актыўна прапаноўваць варыянты, што рабіць з незвычайным госцем, і жартаваць з яго прыгод:
«Пралічыўся, але дзе. Думкі гекона».
«Без ведання мовы яму будзе складана».
Некаторыя прапаноўвалі пакінуць гекона проста ў кватэры:
«У нас яны проста дома жывуць, самі кормяцца, у гэтым годзе тры штукі. Можна проста выпусціць, хай тусуецца».