«Ёсць у Беларусі людзі, якім не падабаецца расійскі сцяг, савецкі сцяг». Расіяніну на BMW X7 з нямецкімі нумарамі пашкодзілі аўто ў Мінску
Мужчына трапіў у прыгоды па дарозе з Германіі ў Расію, а цяпер і на зваротным шляху.
Скрыншоты тут і далей: vova_gebel/Instagram
«У Беларусі ў мяне адбыўся інцыдэнт»
Расіянін Уладзімір, які з 1999 года жыве ў Германіі, у пачатку ліпеня паехаў у Расію праз Беларусь. Пабываўшы на радзіме, ён вяртаецца ў Еўропу, але з прыпынкам у Мінску.
У сталіцы Беларусі яго напаткалі непрыемнасці. Уладзімір выклаў відэа, дзе расказвае пра тое, што ў Мінску пашкодзілі ягоную BMW X7. На аўтамабілі шмат налепак: расійскі і савецкі сцягі з гербамі і два праваслаўныя крыжы, налепленыя на пярэднія дзверы.
У відэа мужчына кажа, што ўвечары заўважыў, што нехта пашкодзіў мацаванне люстэрка задняга віду з боку кіроўцы.
«Не ведаю нават, як гэта магло адбыцца, чым ударылі або што, але вось так у Беларусі ў мяне адбыўся інцыдэнт», — кажа Уладзімір і паказвае пашкоджанае ў дзвюх месцах мацаванне люстэрка.
Асноўная шкода прыйшлася на ніжнюю частку, дзе бачна моцная ўмяціна, праз якую мацаванне прыкметна адлучылася ад дзвярэй. Другое пашкоджанне менш заўважнае, яно знаходзіцца ў верхняй частцы мацавання.
У гэтым відэа ён толькі выказваў здагадкі, што гэта могуць быць пашкоджанні ад стрэлаў з траўматычнай зброі.
«Хутчэй за ўсё прыцэльваліся ў шыбу, у мяне, так бы мовіць. Але калі машына ў руху — цяжка патрапіць. Ну, дзякуй Богу, патрапілі побач», — кажа Уладзімір і дадае, што ёсць такі газавы пісталет з круглымі кулямі.
Мужчына прыходзіць да высновы, што не ўсім у Беларусі падабаюцца «баявая» налепка ягонай BMW.
«Як бы ні было, ёсць у Беларусі такія людзі, якія тут жывуць і ім, напэўна, не падабаецца расійскі сцяг, савецкі сцяг, можа, я ім не падабаюся», — кажа ён.
157 км/г па МКАД
І як можна ўбачыць на відэа, якія Уладзімір выкладае ў сацсеткі, не падабацца ён можа не толькі тым, што абляпіў аўто сцягамі і крыжамі.
У адным з апошніх відэа мужчына паказвае, як рухаецца па МКАД. У пікавыя моманты хуткасць на спідометры дасягае 155‑157 км/г. Па самім горадзе ён разганяўся да 133 км/г.
Дарэчы, па дарозе ў Расію ён таксама здымаў відэа ў Беларусі, дзе было бачна значнае перавышэнне хуткасці. Праўда, на папярэдніх відэа максімум, які можна было ўбачыць, быў 143 км/г.
Падчас мінулай паездкі па Беларусі мужчына нават трапіў на камеру даішнікаў і заплаціў штраф за хуткасць. Праўда, перавышэнне, з якім яго злавілі, было нязначным — усяго на 15 км/г, што дробязі ў параўнанні з тым, як ён ганяе на відэа.