Старыя карпусы Мінскага гадзіннікавага завода чакае маштабная рэканструкцыя

Прамысловая тэрыторыя Мінскага гадзіннікавага завода на праспекце Незалежнасці працягвае мяняць сваё аблічча. Паводле праекта, апублікаванага адміністрацыяй Першамайскага раёна Мінска, частка былых вытворчых будынкаў будзе пераўтвораная ў сучасны дзелавы і медыцынскі комплекс, піша Domovita.by.

Рэндэры: адміністрацыя Першамайскага раёна Мінска

Тэрыторыя завода ўжо перастала быць закрытай прамысловай зонай. Тут працуюць музей прадпрыемства і гастрапляцоўка «Найлепшая вуліца». Цяпер плануецца рэканструкцыя яшчэ двух аб'ектаў.

Найбольш значныя змены закрануць вытворчы корпус №10. Цяперашні трохпавярховы будынак амаль цалкам дэмантуюць, захаваўшы толькі частку падвала. На яго месцы пабудуюць новы сяміпавярховы комплекс.

Рэндэр: адміністрацыя Першамайскага раёна Мінска

Будынак будзе аформлены ў сучасным архітэктурным стылі. Праект прадугледжвае маналітны каркас, сцены з ячэістага бетону і вентыляваны фасад цёмных колераў з вялікімі панарамнымі вокнамі. Вышыня новага корпуса складзе каля 34 метраў.

На першым паверсе размесцяцца гандлёвыя памяшканні плошчай каля 290 квадратных метраў і медыцынскі блок. З другога па сёмы паверх будуць знаходзіцца офісы і адміністрацыйныя памяшканні.

Рэндэр: адміністрацыя Першамайскага раёна Мінска

Праект таксама прадугледжвае стварэнне выставачнай інфраструктуры. На трэцім і шостым паверхах з павялічанай вышынёй столяў з'явяцца выставачныя залы плошчай каля 170 квадратных метраў кожная, а таксама канферэнц-зала.

Падвальныя памяшканні будуць выкарыстоўвацца для тэхнічных патрэб — размяшчэння вентыляцыйнага абсталявання і электрашчытавой. Агульная плошча новага корпуса складзе каля 5,2 тысячы квадратных метраў.

Рэндэр: адміністрацыя Першамайскага раёна Мінска

Змены закрануць і былы склад хімічных матэрыялаў. Яго пераабсталююць пад медыцынскі цэнтр са стаматалагічнымі лабараторыямі. Пасля рэканструкцыі ў будынку будуць працаваць два кабінеты зубных тэхнікаў, гіпсавальная і пакой для персаналу. Каля ўваходу плануецца адкрыць невялікі кававы пункт.

Праект прадугледжвае ўпарадкаванне ўсёй прылеглай тэрыторыі. Для супрацоўнікаў і наведвальнікаў будзе створана 78 парковачных месцаў: 50 непасрэдна каля новых будынкаў і яшчэ 28 — на тэрыторыі завода.

Рэндэр: адміністрацыя Першамайскага раёна Мінска

Прадугледжваецца захаванне наяўных зялёных насаджэнняў і стварэнне новых газонаў. Усе новыя аб'екты будуць адаптаваныя для людзей з абмежаванымі магчымасцямі: праект уключае безбар'ерныя ўваходы і ліфты.

Рэндэр: адміністрацыя Першамайскага раёна Мінска

Азнаёміцца з матэрыяламі праекта і выказаць свае заўвагі або прапановы жыхары Мінска могуць да 10 жніўня ў рамках грамадскага абмеркавання. Таксама экспазіцыя праекта прадстаўленая ў будынку адміністрацыі Першамайскага раёна.

Каментары да артыкула