Польскія ВПС падымалі знішчальнікі, у польскім Любліне гучалі сірэны паветранай трывогі
Польскае вайсковае камандаванне заявіла, што войска гатовае да неадкладнага рэагавання.
У ноч на 30 ліпеня ў польскім Любліне гучала паветраная трывога.
Дзеля абароны паветранай прасторы Польшчы былі паднятыя ў паветра знішчальнікі і самалёт далёкага радыёлакацыйнага выяўлення, а наземныя сістэмы ППА і радыёлакацыйнай разведкі былі прыведзены ў стан высокай гатоўнасці.
Аператыўнае камандаванне Узброеных сіл Польшчы заявіла, што дзеянні насілі прэвентыўны характар і былі звязаны з чарговай атакай РФ па тэрыторыі Украіны.
Некаторыя ўкраінскія маніторынгавыя каналы інфармавалі пра магчымы залёт расійскіх ракет у паветраную прастору Польшчы, аднак афіцыйнага пацверджання гэтаму з боку польскіх вайскоўцаў няма.
Вайсковае камандаванне падкрэсліла, што сітуацыя знаходзіцца пад поўным кантролем, а сілы гатовыя да неадкладнага рэагавання.