«Байсол» запусціў традыцыйны збор для дзяцей палітвязняў перад 1 верасня
Плануюць сабраць 10 тысяч еўра з разліку 100 еўра на дзіця.
«Гэта дабрачынны збор у падтрымку самых маленькіх — дзяцей беларускіх палітвязняў, якія знаходзяцца як у Беларусі, так і за яе межамі. У нашых руках — магчымасць рэальна ім дапамагчы», — паведамляе «Байсол».
Зазначаецца, што штогод «Байсол» атрымлівае каля двухсот заявак на ўдзел у дзіцячым школьным зборы, такім як гэты. Па дапамогу звяртаюцца сем’і, дзе абодва бацькі або адзін з бацькоў знаходзяцца ў зняволенні альбо былі асуджаныя па палітычных матывах. У большасці выпадкаў такія сем’і знаходзяцца ў складаным становішчы, а падрыхтоўка дзіцяці да школы становіцца для іх дадатковай фінансавай нагрузкай.
Дапамога 100 еўра ў межах Дзіцячага збору дазваляе пакрыць самыя неабходныя выдаткі: набыць школьныя прыналежнасці і хаця б частку школьнага адзення. Гэта простыя рэчы, без якіх дзіцяці складана адчуваць сябе на роўных з аднагодкамі. Гэта таксама наш спосаб паказаць і дзецям, і дарослым, што побач ёсць шмат неабыякавых людзей.
На кожнае дзіця ва ўзросце да 16 гадоў будзе выплачана па 100 еўра.
Агульная сума ўказаная з улікам камісій банка і плацежных сістэм.
Заяўкі на атрыманне дапамогі прымаюцца да 21 жніўня ўключна.
Хто можа падаць заяўку на атрыманне дапамогі?
- сем'і палітзняволеных з дзецьмі, у якіх адзін з бацькоў ці абодва знаходзяцца ў зняволенні не менш чым тры месяцы (у тым ліку на «хіміі» з накіраваннем або без);
- былыя палітзняволеныя з дзецьмі, вызваленыя пасля 1 студзеня 2024 года.
Каб атрымаць дапамогу, трэба запоўніць форму. Калі вы хвалюецеся за вашу бяспеку, запаўняйце яе, не дасылаючы дакументы. «Байсол» скантактуецца і ўдакладніць неабходную інфармацыю.