Грыбнік паказаў сем відаў лісічак з беларускіх лясоў
Некаторыя — сапраўдны далікатэс у Еўропе.
Сем відаў лісічак з беларускіх лясоў. Скрыншот тут і далей: ip.chaser / Instagram
Вядомы грыбнік Аляксандр Гарбацэвіч паказаў сем відаў лісічак з беларускіх лясоў.
Каб зняць гэты кадр, ён рыхтаваўся чатыры гады — аб'ездзіў і абышоў шмат месцаў, каб знайсці, дзе растуць гэтыя грыбы.
Першы від — лісічка жоўтая, звычайная. Іх ведаюць усе — менавіта гэтыя лісічкі часцей за ўсё збіраюць грыбнікі.
Лісічка жоўтая
Другі від — лісічка бледная. Вельмі падобная да жоўтай, але светлая-белая па колеры, больш масіўная і больш рэдкая.
Лісічка бледная (злева)
Трэці від — чырвонакніжная чорная лісічка. «Агулам у свеце яе шмат расце: на Кубані ў безлімітных колькасцях, у краінах Еўропы яе вельмі любяць, цэняць. У ёй 30 лятучых злучэнняў навукоўцы знайшлі. І ў залежнасці ад таго, як яе тэрмічна апрацаваць, розныя смакавыя элементы, таму шэф-кухары яе вельмі любяць. У Англіі гэта «труба смерці», а ў Францыі — «рог багацця»», — расказвае Гарбацэвіч.
Чорная лісічка
Чацвёртая — лісічка жаўцеючая, вельмі рэдкая. Яны растуць на балоце. Калі шмат дажджоў, зямля будзе пад вадой, лісічкі не ўзыдуць. Але і калі засуха — таксама. «У Беларусі адно месца, дзе яны растуць. Дадаць у Чырвоную кнігу неадкладна — гэта самы рэдкі від», — кажа грыбнік.
Лісічка жаўцеючая
Пяты від — лісічка трубчастая. «Гэта позні від, паўночны, галоўны грыб Фінляндыі», — адзначае грыбнік. У адрозненне ад лісічкі жаўцеючай, у іх больш жоўтыя ножкі, пругкая кансістэнцыя, смак мацнейшы.
Лісічка трубчастая
Шосты і таксама вельмі рэдкі від — лісічка булавападобная. Фіялетава-сірэневага колеру, могуць вырастаць да 14 сантыметраў у вышыню і да 10 сантыметраў у шырыню.
Лісічка булавападобная
І сёмы від — лісічка ілжывая, ці гаварушка аранжавая. Пад шапкай грыб ружаватага адцення, зверху шапка светлая. Гэта ядомыя грыбы, калі адварыць.
Лісічка ілжывая
Аляксандр дадае, што ў кадр не трапілі яшчэ два віды лісічак, якія ёсць у Беларусі. Гэта лісічка шэрая (яна знаходзіцца ў Чырвонай кнізе, Аляксандр ніколі не бачыў гэты від) і ружовая лісічка.