У Краснадары шматдзетны беларус папрасіў расіяніна не мацюкацца. Але так няўдала, што той ударыўся патыліцай аб сметніцу і памёр
П'яны расіянін абазваў беларуса «чортам» — і пачалося.
У Краснадары суд вынес прысуд 47‑гадоваму беларусу Паўлу Янкевічу, які прыехаў у Расію на вахтавую працу — дэмантаваць будаўнічыя рыштаванні ў аэрапорце. Яго асудзілі на 2 гады 11 месяцаў калоніі строгага рэжыму за смерць расіяніна, з якім ён паспрачаўся ноччу каля гасцініцы для рабочых.
У ноч здарэння беларус прачнуўся ад крыкаў і лаянкі — расіянін Барысаўскі быў моцна п'яны і роў на ўсю вуліцу. Янкевіч выйшаў і папрасіў яго суцішыцца, каб той не будзіў людзей перад працоўным днём.
Той не паслухаўся, а потым абазваў беларуса «чортам». У адказ Янкевіч ударыў яго рукой па твары — Барысаўскі страціў раўнавагу, упаў і стукнуўся патыліцай аб металічны смеццевы кантэйнер.
Экспертыза паказала: менавіта ўдар рукой (а не ўдар аб кантэйнер) выклікаў крывацёк пад мазгавымі абалонкамі, ад чаго праз некалькі гадзін наступіла смерць. Янкевіч і яго знаёмыя спрабавалі рэанімаваць пацярпелага — рабілі масаж сэрца, штучнае дыханне, выклікалі хуткую, якая ехала больш за дзве гадзіны. Выратаваць чалавека не ўдалося.
Сам Янкевіч сваю віну прызнаў толькі часткова: удар нанёс, але не меў намеру прычыніць цяжкую шкоду здароўю і не думаў, што ад аднаго ўдару чалавек можа памерці.
Суд, аднак, кваліфікаваў дзеянні як наўмыснае прычыненне цяжкай шкоды здароўю, што па неасцярожнасці прывяло да смерці (ч.4 ст.111 КК РФ). Сярод змякчальных абставін — трое малалетніх дзяцей у Янкевіча, амаральныя паводзіны загінулага як прычына канфлікту і тое, што беларус аказваў дапамогу пацярпеламу.