У Мінску пройдзе бясплатны музычны пікнік з беларускімі артыстамі
У апошнюю суботу лета.
У Мінску 29 жніўня пройдзе музычны пікнік Utka Day — аднадзённы фестываль з канцэртамі, лекцыямі, спортам, маркетам лакальных брэндаў і фудкортамі. Мерапрыемства адбудзецца адразу на трох пляцоўках каля станцыі метро «Парк Чалюскінцаў»: у «Скверы», «Эха» і «Эха двары» (пр-т Незалежнасці, 95/5), піша Onliner.by.
Дзённая праграма працягнецца з 12:00 да 22:00. Уваход на яе будзе бясплатным, набываць білет або загадзя рэгістравацца не спатрэбіцца.
Галоўнай часткай Utka Day стане музыка. У праграме — маладая беларуская сцэна: ад мінскага хіп-хопу да інды-року.
На сцэне ў «Скверы» выступяць Loukii, «мінімаркет», Postoyanno, Saint Wenz, Alexey Krivdin і Wasssup. Арганізатары таксама абяцаюць сакрэтнага госця.
Паралельна ў «Эха Двары» пройдзе шматгадзінны дыджэй-сэт. Удзень музыка будзе суправаджаць розныя актыўнасці, а ўвечары пляцоўка ператворыцца ў танцпляцоўку пад адкрытым небам. Пры гэтым фестываль задуманы не толькі як музычнае мерапрыемства. Дзень пачнецца з прабежкі і заняткаў ёгай. У «Эха двары» правядуць квіз, танцавальны батл і майстар-клас па электрадэнсе ад Валеры Чвалава.
Таксама на тэрыторыі размесцяцца інтэрактыўная зона «Дружба», маркет беларускіх брэндаў і рамеснікаў, фудтракі.
Пасля гэтага Utka Day працягнецца ўжо платнай начной вечарынкай — з 22:00 да 04:00. Яе адкрые PILLIBERG, затым выступяць Zhоra Popkin і Trace Visv, RealLowly Pluto і ФРУКТ. Завершыць праграму сумесны сэт BRAVO і distortion808.
Для начной часткі спатрэбіцца асобны білет, ён каштуе 35 рублёў.