Прапагандыст Рачылоўскі кардынальна змяніў імідж ФОТАФАКТ
29‑гадовы прапагандыст Мікіта Рачылоўскі, вядомы сваёй апантанай адданасцю рэжыму, памяняў бюракратычна-наменклатурны стыль на бунтарскі рэвалюцыйны вобраз.
Так Мікіта Рачылоўскі выглядаў раней
Рачылоўскі апублікаваў здымкі з маладзёжнай антыфашысцкай сустрэчы «Рух наперад», дзе ён з’яўляецца старшынёй савета. «Пляцоўка створана ў адказ на актуальныя сусветныя падзеі, дзе выразна прасочваюцца небяспечныя тэндэнцыі неафашызму», — гаворыцца ў паведамленні.
На здымках звяртаюць увагу змены ў вобразе старшыні Рачылоўскага. Яшчэ нядаўна ён дэманстраваў класічны ўзор наменклатурнага стылю. Прычым, выглядае, Рачылоўскі тады для саліднасці фарбаваў валасы ў больш цёмны колер.
А цяпер перад намі — у берэце з зоркай светлавалосы Чэ Гевара, адаптаваны пад беларускія дзяржаўна-патрыятычныя патрэбы.
Так Рачылоўскі выглядае ў жніўні 2026 года
Зорка Мікіты Рачылоўскага заззяла на небасхіле беларускай прапаганды ў 2022 годзе. Тады 25‑гадовага хлопца прызначылі кіраўніком Моладзевага парламента — ён нават атрымаў чырвона-зялёны букет з рук Наталлі Качанавай. Тады ж Мікіта стаў кіраваць моладзевым грамадскім аб'яднаннем «Рух наперад».
У 2023 годзе Мікіта як кіраўнік Моладзевага парламента катаўся ў «ДНР» і хваліўся тым, што заключыў дамову аб супрацоўніцтве з тамтэйшым Моладзевым парламентам.
У тым жа 2023 годзе Рачылоўскі стаў частым госцем ток-шоу на беларускім тэлебачанні. Ад імя беларускай моладзі ён асуджаў «нацыянал-здраднікаў». Яму даверылі весці праграму «Сенат» на СТБ і браць інтэрв'ю ў дэпутатаў.
Хлопец нават абяцаў памерці за Лукашэнку.
У жніўні 2024 года Рачылоўскі трапіў пад санкцыі Еўрасаюза.
Але далей кар’ера забуксавала.