Турыст прабег вакол Нарачы 56 кіламетраў — і спазніўся на апошні аўтобус
Мужчына вырашыў прабегчы вакол Нарачы, праклаўшы маршрут так, каб захапіць і суседнія малыя азёры, піша Kraj.by.
У паходны заплечнік адправіліся намёт, спальнік, ежа, вада і ўсё неабходнае для начлегу. Стартаваў падарожнік ад аўтавакзала ў Мядзелі, а затым бег ляснымі сцежкамі, пясчанымі пляжамі і прасёлкавымі дарогамі, любуючыся краявідамі і разглядаючы мясцовыя славутасці.
Да вечара ён вярнуўся да месца старту, замкнуўшы кола. Паводле даных трэкера, дыстанцыя склала 56 кіламетраў.
Спазніўшыся на апошні аўтобус, ён паставіў палатку проста ў лесе і пераначаваў пад адкрытым небам.