У Беларусі падымалі авіяцыю праз расійскія гібрыдныя дроны «Бандэроль». Заляцелі 12 беспілотнікаў
Адразу некалькі ўкраінскіх маніторынгавых каналаў паведамілі, што раніцай 22 жніўня на тэрыторыю Беларусі заляцелі сама меней 12 расійскіх дронаў «Бандэроль», заўважыла «Свабода». Згодна з інфармацыяй украінскіх каналаў, з аэрадрома Баранавічаў падымалі вайсковы самалёт. У той жа час няма звестак пра тое, як расійскія беспілотнікі абясшкодзілі — збілі ці ўздзейнічалі сродкамі радыёэлектроннай барацьбы.
Аскепкі расійскага дрона, знойдзеныя ў Малдове, 17 жніўня 2026 года
У якіх кірунках рухаліся расійскія дроны
Паводле Telegram-каналв «Ринда моніторить», «Бандэролі» пачалі рухацца ў бок Беларусі з 4‑й раніцы. Інфармацыя пра першы дрон, што ляцеў у кірунку зліквідаванай пасля чарнобыльскай катастрофы вёскі Чыкалавічы Брагінскага раёну Гомельскай вобласці, з'явілася а 04:01.
А 04:04 — на вёску Уласы Баранавіцкага раёну Брэсцкай вобласці.
А 04:06 і 04.15 — дзве «Бандэролі» — на Нароўлю (Гомельская вобласць). Адна з іх адразу ўзяла курс на Мазыр.
Аб дроне на Петрыкаў (Гомельская вобласць) інфармацыя з'явілася а 04:24.
Дрон у кірунку аграгарадка Скрыгалаў (Брагінскі раён, Гомельская вобласць) «Бандэроль» зафіксавалі а 04:28.
А 04:28 — яшчэ адзін дрон на Петрыкаў, а 04:36 — на Радкаў Петрыкаўскага раёна Гомельскай вобласці, а 04:41 — на Капаткевічы Петрыкаўскага раёна.
А 04:45 з'явілася інфармацыя аб «Бандэролі», што рухалася ў бок мястэчка Азарычы Калінкавіцкага раёна Гомельскай вобласці. Паводле ўкраінскага маніторынгу, менавіта там у паветра паднялі знішчальнік Су-30.
Праз дзве гадзіны пасля гэтага — а 06:22 з'явілася інфармацыя аб расійскім дроне ў раёне Ельска (Гомельская вобласць), а 06:30 — на Мазыр.
Яшчэ адзін украінскі маніторынгавы канал а 04:33 аб дроне ў раёне ракі Пціч паведаміў і а 04:40 — у Капаткевічах (імаверна, гэта той жа дрон, аб якім а 04:41 паведамляў першы канал).
Паводле каналу «ЄРадар», а 04:42 з аэрадрому ў Баранавічах у паветра падняўся яшчэ адзін вайсковы самалёт.
Што вядома пра расійскія дроны «Бандэроль»
Дроны «Бандэроль» — гібрыд малагабарытнай крылатай ракеты і рэактыўнага ўдарнага дрона. Ён мае хуткасць да 650 кіламетраў на гадзіну і здольнасць перагружаць супрацьпаветраную абарону.
Далёкасць палёту гэтага дрона складае 500 кіламетраў, ён можа несці да 50 кілаграмаў выбухоўкі.
У сілах супрацьпаветранай абароны Украіны неаднаразова заяўлялі, што галоўная небяспека «Бандэроляў» у тым, што іх праз рэактыўны рухавік і высокую хуткасць складана перахапіць мабільнымі групамі.
Для збіцця гэтага віду беспілотнікаў патрэбныя больш складаныя зенітныя комплексы.
Апроч таго, гэтыя ракеты-дроны маюць вялікую плошчу аскепкавага паражэння цэляў.
Вядома сама меней два выпадкі, калі «Бандэролі» заляталі на тэрыторыю Малдовы. У адным выпадку ён пацэліў у дрэва, але ад выбуховай хвалі тады моцна пацярпелі прыватныя будынкі аднаго з населеных пунктаў. Пасля гэтага выпадку Кішынёў адклікаў свайго пасла з Расіі.