На Камароўцы ў Мінску пачаўся сезон грыбоў. Пачым прадаюць баравікі і лісічкі
Пакупнікі на Камароўскім рынку ў Мінску нарэшце дачакаліся багацця баравікоў. Праўда, пакуль гэта задавальненне не з танных.
Грыбы прадаюць вялікія і маленькія, на вагу і паштучна, а таксама ў вядзерцах рознага памеру. Аднак цана пры гэтым прыкладна аднолькавая — 50—100 рублёў за 1 кг, піша «Смартпрэс».
Пакупнікі глядзяць з захапленнем, пытаюцца ў прадаўцоў пра лясы, у якіх былі сабраныя грыбы («Мінская вобласць, не хвалюйцеся»), але купляюць нямногія.
Лісічкі таксама ёсць, і даволі бюджэтныя ў параўнанні з баравікамі: за іх просяць 10—15 рублёў за 1 кг.