Telegram абнавіўся, і гэтым адразу ж скарысталіся махляры

У Telegram з’явілася новая схема махлярства, якой ужо пачалі карыстацца зламыснікі. Яны выкарыстоўваюць убудаваныя міні-праграмы, якія сталі больш даступнымі пасля нядаўняга абнаўлення месенджара ад 25 жніўня.

Фота: t.me/CYBER_FORTRESS_BREST

Карыстальніку могуць даслаць паведамленне з прывабнай кнопкай — напрыклад, прапанаваць пагуляць у гульню, прайсці апытанне або атрымаць прыз.

Пасля націскання ў Telegram адкрываецца акно, якое выглядае як звычайны і бяспечны сэрвіс. Аднак далей чалавека могуць папрасіць увесці асабістыя звесткі, пацвердзіць дзеянне або падключыць свой акаўнт. Калі даверыцца такому запыту і ўвесці свае звесткі, можна страціць доступ да акаўнта ці нават грошы.

Спецыялісты раяць не націскаць на падазроныя кнопкі ў паведамленнях ад незнаёмых людзей і не ўводзіць асабістую інфармацыю ў вокнах, якія адкрываюцца праз сумнеўныя спасылкі. Калі прапанова выглядае занадта прывабнай, лепш закрыць яе і самастойна праверыць інфармацыю праз афіцыйныя крыніцы.

Каментары да артыкула