«Калі мне было два гады, сваякі павезлі мяне ў Беларусь». Праз сацсеткі дзяўчына адшукала бацьку-расіяніна — але скончылася гісторыя сумна
Цяпер Стасі Стральчэні 24 гады, у яе ёсць муж і сын. Беларуска вырашыла знайсці бацьку, якога нават не памятае — бо верыла, што яго няма ў яе жыцці перадусім праз забарону маці.
Фота з інстаграма Стасі Стральчэні
Сваю драматычную гісторыю Стася апублікавала ў Threads. Нарадзілася яна ў расійскім Новамічурынску, гэта 250 км ад Масквы. Кажа, што яе бацька — Юрый Ерхаў — прыходзіў паглядзець на нованароджаную дачку, але быццам бы іншыя сваякі Стасі былі супраць таго, каб той неяк камунікаваў з дзіцём.
«Калі мне было два гады, мама і бабуля павезлі мяне ў Беларусь. А ў чатыры гады мы прыехалі ў Расію да маёй прабабулі. І ён таксама прыйшоў. Але яму дазволілі толькі паглядзець на мяне, пакуль я спала. Ён паплакаў і пайшоў».
Усё гэта дзяўчына даведалася з расповедаў блізкіх.
Цяпер ёй 24 гады. Стася сама ўжо паспела стаць жонкай і маці. Але ж думкі пра тое, што хочацца пазнаёміцца з татам, не адпускалі.
Так бацька Стасі выглядаў у 11 класе
У выніку беларуска вырашыла праверыць моц Threads і напісала ўсё, што ведала пра бацьку — і дадала яго школьнае фота. Допіс Стасі паглядзелі больш за 200 тысяч разоў, ён сабраў некалькі соцень каментароў.
У хуткім часе ёй распавялі, што ў мужчыны нарадзілася яшчэ двое сыноў. Стасі даслалі некалькі кантактаў яго імаверных сваякоў — адзін з іх аказаўся памылковым.
Знайсці рэальнага тату ўдалося за два дні. Стася напісала яму, але мужчына адмовіўся размаўляць з дачкой і папрасіў больш не турбаваць яго і яго сям’ю.
Беларуска прызналася, што ёй балюча, але яна паважае рашэнне бацькі.
У каментарах меркаванні падзяліліся. Нехта вінаваціць у сітуацыі маму Стасі — маўляў, а раптам бы мужчына быў добрым татам. Нехта, наадварот, лічыць, што ніякія забароны не змаглі б спыніць чалавека, які хоча быць сапраўдным бацькам. Ёсць і тыя, хто мяркуе, што ўвогуле не варта было шукаць мужчыну, бо ён свой выбар даўно зрабіў.
Хтосьці паспрабаваў суцешыць. Маўляў, а раптам у бацькі проста шок і ён праз некаторы час сам выйдзе на сувязь. Але Стася адказала, што мужчына быў даволі катэгарычным у сваёй адмове.
Беларуска ўдзячна кожнаму, хто далучыўся до пошукаў: «Я ўвогуле не чакала, што столькі незнаёмых людзей так уключацца ў маю гісторыю — будуць шукаць, пісаць мне, падтрымліваць. Да гэтага часу крыху ў шоку ад таго, што ўсё гэта ўвогуле адбылося. Я прыйшла сюды ў надзеі знайсці аднаго чалавека. А ў выніку знайшла столькі людзей, дзякуючы якім увесь гэты час адчувала сябе не такой самотнай».