Усе спевакі зняліся з канцэрта Эда Шырана, пасля таго як рэпера Маклмора выгналі за прапалесцінскія выказванні
Вялікі скандал падчас туру выканаўцы па ЗША.
Эд Шыран і Маклмор, фота: Ethan Miller / Getty Images for iHeartMedia
Усе гурты і выканаўцы, якія выступалі на разагрэве ў туры Эда Шырана па ЗША, адмовіліся ад удзелу пасля таго, як з туру выключылі Маклмора з праграмы за прапалесцінскія выказванні са сцэны, піша Бі-бі-сі.
Сярод іх быў Фінэас, брат поп-зоркі Білі Айліш. У сваёй заяве ён сказаў: «Нельга прымушаць артыстаў маўчаць, калі яны выступаюць у абарону прыгнечаных».
Пра свой сыход таксама абвясцілі ірландскі спявак і аўтар песень Аарон Роу і дацкі гурт Lukas Graham. Ірландскі фолк-гурт Beoga, які кожны вечар выступае разам з Шыранам на сцэне, таксама адмовіўся ад удзелу.
Гэтыя заявы прагучалі праз некалькі гадзін пасля таго, як Шыран заявіў, што не будзе ўцягвацца ў публічную дыскусію вакол Газы, і падкрэсліў, што менавіта ён не прымаў рашэнне аб выключэнні Маклмора з тура.
«Маклмор сышоў з тура па рашэнні арганізатараў, гэта было не маё рашэнне», — напісаў Шыран у Instagram.
«Я ніколі не падвёў бы фанатаў, якія ўжо спланавалі свае паездкі, і не пакінуў бы без падтрымкі гастрольную каманду, а таксама іншых выканаўцаў і музыкаў, якія залежаць ад гэтай працы і зарабляюць ёю на жыццё», — сказаў ён.
Раней у гэтым месяцы Маклмор — сапраўднае імя Бенджамін Хагерці — падчас двух канцэртаў у Нью-Джэрсі заклікаў да «свабоднай Палесціны» і паказваў выявы разбурэнняў у Газе.
Яго выказванні выклікалі крытыку з боку яўрэйскіх арганізацый. Пасля гэтага некаторыя пляцоўкі пачалі ціснуць на арганізатараў тура, каб тыя выключылі яго з праграмы.
У сваёй заяве Шыран сказаў, што на працягу ўсяго тыдня «доўга размаўляў» з прадстаўнікамі пляцовак, спрабуючы «знайсці масты» паміж бакамі, але ў выніку арганізатары тура, Messina Touring Group, вырашылі спыніць супрацоўніцтва з Маклморам.
Пры гэтым Шыран заявіў, што яго «ўражвае канфлікт паміж Ізраілем і Палесцінай», а «пакуты і боль, выкліканыя з абодвух бакоў, — гэта чалавечая трагедыя». Аднак ён таксама паспрабаваў растлумачыць сваё рашэнне трымацца далей ад палітычных пытанняў у сваёй прафесійнай дзейнасці.
«Я не з'яўляюся суўдзельнікам», — напісаў ён. — У мяне ёсць асабістае меркаванне наконт гэтага разбуральнага канфлікту. Тое, што я выбіраю не выказвацца публічна, не азначае, што ў мяне няма свайго меркавання і што мне ўсё роўна».
Скандал пачаўся 4 верасня, калі Маклмор выступіў на канцэрце Эда Шырана на стадыёне MetLife у Нью-Джэрсі.
Ён сказаў гледачам: «Вялікая частка прычыны, чаму я наогул хацеў адправіцца ў гэты тур, заключаецца ў тым, каб я мог выйсці на стадыёны, падобныя да гэтага, і сказаць два словы, якія вельмі, вельмі дарагія майму сэрцу: «Свабодная Палесціна».
Пасля гэтага ён выканаў сваю песню «Hind's Hall», прысвечаную прапалесцінскім пратэстоўцам у Калумбійскім універсітэце і з крытыкай ваенных дзеянняў Ізраіля ў Газе. На вялікім экране ў гэты час паказвалі кадры разбурэнняў у Газе.
Частка гледачоў вітала яго словы воклічамі, але амаль адразу ў інтэрнэце пачалася крытыка.
Амерыканска-ізраільская рада (Israeli American Council) запусціўла петыцыю з патрабаваннем выключыць яго з тура. Група StopAntisemitism заявіла, што музыкант заспеў фанатаў знянацку прапагандай — гэтае сцвярджэнне распаўсюдзіла таксама поп-зорка Пінк, якая перапосціла яго ў Instagram.
На наступны вечар Маклмор зноў выйшаў на тую ж сцэну і непасрэдна звярнуўся да сваіх «яўрэйскіх братоў і сясцёр» сярод гледачоў.
«Крытыка Ізраіля, крытыка апартэіду, выступленне супраць генацыду — усё гэта ні ў якім разе не з'яўляецца крытыкай вас», — сказаў ён, дадаўшы, што хацеў, каб людзі ў Газе і на Заходнім беразе ведалі: пра іх не забыліся.
Ізраіль адмаўляе абвінавачванні ў генацыдзе, сцвярджаючы, што яго вайскоўцы праводзяць у Газе і на акупаваным Заходнім беразе аперацыі па самаабароне ў адпаведнасці з міжнародным правам.