Брат беларускай каралевы прыгажосці трапіў у рэанімацыю ў Азербайджане
Прамысловы альпініст Дзмітрый Чычыкаў трапіў у бяду ў замежжы. Падчас працы ў Азербайджане з беларусам здарыўся няшчасны выпадак, пасля якога ён тры месяцы ляжыць у рэанімацыі. Сям'я ў Беларусі шукае грошы на лячэнне.
Фота: katya.chichikova / Instagram. Якасць фота палепшаная з дапамогай ШІ
Дзмітрый Чычыкаў — прафесійны прамысловы альпініст з міжнародным сертыфікатам IRATA. Мужчына працаваў за мяжой.
Днямі Кацярына Чычыкава, жонка Дзмітрыя, паведаміла ў сацсетках, што яе муж знаходзіцца ў цяжкім стане ў бальніцы. Усё праз тое, што 20 чэрвеня з Дзмітрыем здарыўся няшчасны выпадак, ад якога ён дагэтуль не можа ачуняць. Перакулілася аўтавышка — машына з пад’ёмнай стралой і люлькай, у якой людзі працуюць на вышыні.
«Ён і яго напарнік упалі з вышыні 18 метраў, напарнік загінуў. Дзіма выжыў і цяпер знаходзіцца ў цяжкім стане — яму трэба лячэнне і рэабілітацыя, пры тым што ён знаходзіцца ў іншай краіне», — піша Кацярына.
Пазней жонка Дзмітрыя расказала болей пра яго стан:
«На гэты момант яго стан ацэньваюць як стабільна цяжкі. У яго пашкоджаны мозг і ўжо было тры аперацыі на галаве. Дактары зрабілі ўсё магчымае, стабілізуюць ягоны стан, і цяпер трэба проста чакаць. Дзіма прыходзіць у прытомнасць, рэагуе на сваё імя, але часцей спіць».
Фота: katya.chichikova / Instagram. Якасць фота палепшаная з дапамогай ШІ
Кацярына апублікавала ў інстаграме нумар дабрачыннага рахунку, праз які збірае дапамогу на лекаванне мужа. Таксама яна далучыла да паста фота даведкі, дзе пералічаныя дыягназы Дзмітрыя і асноўныя медычныя маніпуляцыі, праз якія ён прайшоў. Паводле той даведкі,
Дзмітрый атрымаў цяжкія траўмы галавы і грудной клеткі: шматлікія пераломы чэрапа і рэбраў, пашкоджанні абодвух лёгкіх.
Дзмітрый — брат Аляксандры Чычыкавай, пераможцы конкурсу «Міс свету на вазку» ў 2017 годзе. Пасля фіналу конкурсу ён пісаў у сваім профілі «Укантакце»:
«Слёзы радасці на вачах. Мая сястрычка атрымала тытул «Міс свету 2017»!»
Аляксандра Чычыкава на конкурсе прыгажосці «Міс свету на вазку — 2017»
Чытайце таксама:
Беларуска Аляксандра Чычыкава перамагла ў конкурсе «Міс свету на вазку»
26‑гадовага гамельчука асудзілі на 5,5 года калоніі за «паклёп і знявагу Лукашэнкі»
На беларускія экраны вярнулася інтэлектуальная гульня «Брэйн-рынг»