«Маё сэрца разбіта». Эд Шыран выбачыўся пасля скандалу з адхіленнем рэпера Маклмора праз прапалесцінскія лозунгі
Спявак пракаментаваў канфлікт на Блізкім Усходзе.
Эд Шыран. Фота: Paras Griffin/Getty Images for for iHeartRadio
Брытанскі спявак Эд Шыран даў свой першы канцэрт пасля скандалу з рэперам Маклморам, якога выключылі са складу музыкаў, што выступалі на разагрэве, праз лозунгі ў падтрымку палесцінцаў. Шыран заявіў, што дапусціў памылкі, і пракаментаваў канфлікт на Блізкім Усходзе, піша Бі-бі-сі.
«Я ніколі не хацеў быць музыкам-актывістам, але праз гэтую сітуацыю апынуўся ў самым цэнтры важнай і вострай спрэчкі пра свабоду слова і пра самую складаную палітычную праблему на планеце», — сказаў Шыран у пачатку свайго канцэрта ў Філадэльфіі.
На першым канцэрце тура Loop Tour, які адбыўся ў Нью-Джэрсі 4 верасня, амерыканскі рэпер Маклмор, які выступаў на разагрэве, выкрыкнуў: «Свабоду Палесціне!»
Ён зрабіў гэта, прадстаўляючы сваю песню 2024 года Hind's Hall, прысвечаную памяці пяцігадовай дзяўчынкі, якая загінула падчас наступлення ізраільскіх вайскоўцаў у сектары Газа.
У гэтай песні музыкант таксама падтрымлівае студэнтаў, якія пратэставалі супраць дзеянняў Ізраіля ў Калумбійскім універсітэце.
На другім канцэрце, на наступны дзень, Маклмор звярнуўся да «яўрэйскіх братоў і сясцёр». «Крытыка Ізраіля, крытыка апартэіду, нязгода з генацыдам — гэта ні ў якім разе не крытыка вас асабіста», — сказаў ён.
Улады Ізраіля неаднаразова адхілялі абвінавачанні ў апартэідзе і арганізацыі генацыду ў Газе.
Паводзіны рэпера выклікалі крытыку з боку праізраільскіх груп, у тым ліку петыцыю з патрабаваннем адхіліць Маклмора ад далейшых канцэртаў тура.
Эд Шыран і Маклмор, фота: Ethan Miller / Getty Images for iHeartMedia
Затым выступы Маклмора ў межах тура адмянілі, а мільярдэр Роберт Крафт запатрабаваў не дапусціць выступлення рэпера на стадыёне, які яму належыць. Крафт, які належыць да амерыканскай яўрэйскай супольнасці і падтрымлівае Ізраіль, абвінаваціў рэпера ў распальванні нянавісці. Ён заявіў, што той «толькі распаўсюджвае выбарачную інфармацыю і ігнаруе дзеянні ХАМАС».
Працяг скандалу: што яшчэ сказаў Шыран
Пасля гэтага ўсе артысты, якія павінны былі выступаць на разагрэве на канцэртах Шырана, адмовіліся ад далейшага ўдзелу ў туры, выказаўшы салідарнасць з рэперам.
У выніку гэтага скандалу цэны на квіткі былі зніжаныя, а продажы на астатнюю частку тура Шырана па ЗША ўпалі. Шыран, які раней аддаваў перавагу не выказвацца на тэму палесцінска-ізраільскага канфлікту, патлумачыў, што спрабаваў знайсці кампраміс у сітуацыі з рэперам. Ён дадаў, што Маклмор заключаў кантракт на выступленні з кампаніяй — прамоўтарам тура, і рашэнне аб яго адхіленні прыняла менавіта яна.
Аднак на суботнім канцэрце ў Філадэльфіі Шыран больш падрабязна патлумачыў сваю пазіцыю адносна вайны на Блізкім Усходзе.
Ён сказаў публіцы, што прывык да крытычных каментарыяў у адрас сваёй музыкі, але «на гэтым тыдні крытыка тычылася чагосьці значна больш важнага».
«Мне давялося прымаць складаныя рашэнні — я дапускаю памылкі — і мне вельмі, вельмі шкада», — заявіў спявак.
Ён таксама сказаў, што хоча растлумачыць, «якая мая пазіцыя ў сітуацыі з Ізраілем і Палесцінай і ці азначае мой сённяшні канцэрт, што я прытрымліваюся такой пазіцыі».
«На працягу ўсёй сваёй кар’еры я стараўся не выступаць у ролі палітычнага каментатара, таму што хачу, каб мая музыка і выступленні спрыялі адзінству, а не расколу, — працягнуў ён. — Але гэта гуманітарнае пытанне, і я больш не магу хаваць свае пачуцці з гэтай нагоды».
Шыран назваў напады ХАМАС на Ізраіль 7 кастрычніка 2023 года «жахлівымі і такімі, што пагоршылі шматвяковыя пакуты яўрэйскага народа». Але пры гэтым ён апісаў сітуацыю ў сектары Газа як «катастрафічную, неапраўданую і несувымерную».
«Маё сэрца разбіта праз маштабы разбурэнняў і гібелі мірных жыхароў, у тым ліку дзяцей. І тую сістэмную несправядлівасць, якую мы назіраем на Заходнім беразе, нельга ігнараваць», — сказаў спявак.
Ён дадаў, што цяпер спрабуе зразумець, якім чынам можа дапамагчы «ахвярам гэтага жахлівага часу», і прызнаўся, што недастаткова ведае пра сітуацыю, таму «слухае і вучыцца».
Яго канцэрт «па-ранейшаму застаецца месцам, дзе рады ўсім і дзе кожны можа стаяць плячом да пляча з людзьмі, якія маюць супрацьлеглыя погляды», — сказаў спявак.
Шыран прызнаўся, што не разумеў, ці працягнецца яго тур і ці захоча ён наогул працягваць кар’еру, аднак вырашыў вярнуцца на сцэну дзеля сваіх прыхільнікаў.
Спявак таксама заявіў, што яго «глыбока непакоіць» сітуацыя, пры якой канцэртныя пляцоўкі могуць атрымаць права «загадзя ўхваляць» кантэнт або склад выканаўцаў. Гэта выклікала апладысменты публікі. Відавочна, гэта была адсылка да пазіцыі Роберта Крафта.
Астатнія канцэрты яго тура запланаваныя ў Паўночнай і Паўднёвай Амерыцы.
Хоць папярэдні тур спевака стаў адным з самых касавых за ўсю гісторыю, цэны на некаторыя квіткі на гэты канцэрт знізіліся да 32 даляраў.
Частка фанатаў паведаміла, што ім удалося вярнуць грошы за квіткі, хоць кампанія Ticketmaster і прамоўтар канцэрта Messina Touring Group гэтага не пацвердзілі.
Каля ўваходу ў залу ў Філадэльфіі адбылася акцыя пратэсту прыхільнікаў Палесціны, аднак канцэрт прайшоў спакойна.