Найбуйнейшай у свеце фан-супольнасцю Лэдзі Гагі кіруе хлопец з Мінска, які адседзеў за пратэсты. Расіяне паспяшаліся запісаць яго ў свае
Допіс уладальніка фан-праекта спявачкі пра сваё зняволенне за ўдзел у пратэстах супраць несвабоды выклікаў шквал эмоцый у сацсетках. Многія на Захадзе і ў Расіі ўспрынялі яго як прыклад барацьбы расіян з рэжымам Пуціна.
Кірыл Нгуен. Фота: krzzle
Паведамленне з’явілася 22 верасня 2026 года ў акаўнце Gaga Daily ў твітары і ўжо сабрала больш за тры мільёны праглядаў. У ім заснавальнік праекта патлумачыў прычыну сваёй больш чым двухгадовай адсутнасці:
«Выбачайце за адсутнасць абнаўленняў, я літаральна быў у турме. Гэта Кірыл. Калі вы мяне не ведаеце, я ўладальнік Gaga Daily, і кожны допіс у сацсетках, які вы бачылі з 2009 па 2024 год, быў ад мяне. Я ніколі не выкарыстоўваю гэты акаўнт для асабістых допісаў, але адчуваю, што абавязаны вам усё патлумачыць.
У пачатку 2024 года мяне арыштавалі на радзіме за пратэсты супраць урада і асудзілі больш чым на два гады турмы. На працягу эры MAYHEM гэты акаўнт вялі мае сябры Крысціян і Энтані, якія выканалі неймаверную працу. Цяпер я на волі, я ў бяспецы, і я не магу дачакаць, каб вярнуцца да таго, што я так моцна люблю.
Я надзвычай крануты і ўдзячны за ўсе твіты і паведамленні падтрымкі, якія вы мне даслалі. Я так моцна люблю гэтую супольнасць, і здаецца сюррэалістычным, што так шмат людзей, якія не ведаюць адно аднаго, чыя адзіная сувязь — гэта такая дурасць, як любоў да адной поп-зоркі, могуць сфармаваць такую моцную сувязь, якая доўжыцца столькі гадоў. Дайце ведаць, калі ў вас ёсць пытанні, і не саромейцеся сачыць за мной у IG на @krzzle, калі хочаце заставацца на сувязі. Калі LG8?»
Гэты акаўнт Gaga Daily з’яўляецца часткай найбуйнейшай у свеце супольнасці фанатаў спявачкі Лэдзі Гагі і быў створаны яшчэ ў 2009 годзе. Сёння праект мае афіцыйны сайт з вельмі актыўным форумам, акаўнт у твітары на 487 тысяч чытачоў, профіль у інстаграме, на які падпісана 517 тысяч чалавек, і старонку ў фэйсбуку, на якую падпісана 1,3 мільёна фанатаў спявачкі.
Лэдзі Гага афіцыйна прызнала гэты рэсурс галоўнай пляцоўкай сваіх прыхільнікаў. Ва ўсіх сацсетках праекта прыведзена яе фраза: «Калі я хачу даведацца, што кажуць мае фанаты, я іду на Gaga Daily».
«Рускі хлопец»
Ні ў гэтым допісе, ні ў сваім асабістым інстаграм-акаўнце хлопец не пазначыў ні краіны, ні свайго поўнага імені. Адшукаць гэтую інфармацыю простым пошукам па фотаздымках таксама немагчыма.
З гэтай прычыны імгненна ў сацсетках пачало дамінаваць меркаванне, як сярод заходняй англамоўнай публікі, так і сярод расійскай, што стваральніка Gaga Daily трымалі ў расійскай турме.
Дадатковым трыгерам для віруснага абмеркавання стаў адказ Кірыла аднаму з карыстальнікаў. На пытанне, ці бачыў ён кліп на новую песню Лэдзі Гагі «Abracadabra», уладальнік акаўнта адказаў: «Я жыў у той момант, пакуль гэта іграла па турэмным радыё».
Гэта спарадзіла новую хвалю мемаў. Заходнія фанаты і папулярныя поп-культурныя акаўнты, напрыклад, Pop Hub, пачалі масава пісаць, што трэк «Abracadabra» стаў хітом у расійскіх турмах. Карыстальнікі здзіўляліся факту трансляцыі поп-музыкі для зняволеных і жартавалі пра тое, як вязні ў Расіі адкрываюць для сябе творчасць спявачкі праз радыёкропку.
Тэма песні Лэдзі Гагі «Abracadabra» як турэмнага хіта ўварвалася ў трэнды ў твітары
Адзін з заходніх карыстальнікаў адзначыў іронію, што стэн Тэйлар Свіфт, 19‑гадовая ізраільцянка, была арыштавана і правяла два месяцы ў турме за адмову ўступаць у ЦАХАЛ, а стэн Гагі — за пратэсты ў Расіі. Іншыя былі ўсхваляваныя, што правёўшы мінулы год у расійскай турме, стваральнік аднаго з галоўных фан-праектаў толькі цяпер адкрые для сябе новую эру спявачкі.
Нават просты англамоўны твіт «Gaga Daily рускі???» сабраў тры тысячы лайкаў, а пабачылі яго сотні тысяч карыстальнікаў сацсеткі.
Фанаты таксама звязвалі ўяўны расійскі арышт з гісторыяй самой Лэдзі Гагі, узгадваючы яе канцэрт у Маскве ў 2012 годзе. Тады расійскія ўлады пагражалі спявачцы арыштам за словы ў падтрымку ЛГБТ-супольнасці, што дадало сітуацыі сімвалізму ў вачах заходняй аўдыторыі.
Тэму арышту неўзабаве падхапіў і расійскі сегмент твітара, тлумачачы яго таксама ў кантэксце барацьбы з рэжымам Уладзіміра Пуціна.
Антываенны і апазіцыйны блогер пад нікам «Проф. Преображенский» канстатаваў як факт, што ўладальнік найбуйнейшага акаўнта Лэдзі Гагі — расіянін, які больш за два гады правёў за кратамі за пратэсты супраць рэжыму. Праўда, пасля прыйшлося выпраўляць памылку.
«Падабаецца, што сёння вірусіцца вось гэты твіт і адначасова з ім той, у якім пытаюцца, х*лі рускія не выказваюцца адкрыта наконт вайны. Ну думайце», — пракаментаваў твіт акаўнт з нікам «н-дяя», сабраўшы тысячы лайкаў.
Мноства лайкаў і рэпостаў сабраў і твіт, у якім Кірыл называўся «рускім хлопцам, які адматаў двушачку ў калоніі». На заўвагі ў каментарыях пра беларускі кантэкст яго аўтар лёгка адмахнуўся, маўляў, усяго толькі пашпартам памыліўся, а так ўсё роўна агульны «суровы ўсходнееўрапейскі вайб».
Папулярны бразільскі акаўнт StagePop, не разабраўшыся ў тонкасцях палітычнай сітуацыі ва Усходняй Еўропе, увогуле напісаў, быццам Кірыл быў арыштаваны ва Украіне.
Хто такі Кірыл?
Як паказвае супастаўленне фактаў, размова ідзе пра былога беларускага палітвязня Кірыла Нгуена.
Як піша «Вясна», Кірыла Нгуена затрымалі ў пачатку 2024 года. 10 мая 2024 года суддзя Іна Сівец у судзе Кастрычніцкага раёна Мінска асудзіла яго паводле так званага «народнага» артыкула — ч. 1 арт. 342 Крымінальнага кодэкса (арганізацыя і падрыхтоўка дзеянняў, якія груба парушаюць грамадскі парадак) на 1 год і 6 месяцаў калоніі.
25 сакавіка 2025 года адбыўся другі суд па тым жа артыкуле за іншы эпізод, пасля чаго агульны тэрмін зняволення павялічылі да 2 гадоў і 6 месяцаў. Кірыл Нгуен адбываў пакаранне ў калоніі №17 у Шклове і выйшаў на волю ў пачатку красавіка 2026 года.
Здымак, змешчаны на старонках пра палітзняволенага Кірыла Нгуена на рэсурсах беларускіх праваабаронцаў, наколькі можна меркаваць, належыць іншаму Кірылу Нгуену, які нарадзіўся ў 1996 годзе ў Ханоі.
(Артыкул быў скарэктаваны).