Расійскія трэнеры сцвярджаюць, што дзяржынскі «Арсенал» кінуў іх на 40 тысяч долараў. Клуб пагражае ім крыміналкай
Расіяне кажуць, што спачатку ім плацілі ў канвертах. А калі перайшлі на «белы» заробак, то грошай яны больш не бачылі.
Вячаслаў Вашкевіч. Фота: «Беларусь 5»
Двое расійскіх футбольных трэнераў сцвярджаюць, што дзяржынскі «Арсенал» кінуў іх на 40 тысяч долараў. Беларуская федэрацыя футбола загадала бакам памірыцца, але клуб пагражае трэнерам крымінальнай справай.
Даніла Драсвяннікаў і Вячаслаў Вашкевіч працавалі ў «Арсенале» з лютага 2024 па снежань 2025 года. Вашкевіч нават выконваў абавязкі галоўнага трэнера. Расіяне сцвярджаюць, што да ліпеня частку заробку ім плацілі ў канвертах. Праблем не было, пакуль клуб не вырашыў перавесці іх на «белы» заробак. Пасля гэтага выплаты нібыта часткова спыніліся: не было ані грошай, ані прэмій, піша Mash.
З пачатку 2026 года трэнераў аформілі на паўстаўкі скаўтамі. «Арсенал» абяцаў закрыць даўгі за мінулы год, але не змог гэтага зрабіць. Тады Драсвяннікаў і Вашкевіч звярнуліся ў БФФ. Паводле іх слоў, клуб завінаваціўся ім па 60 тысяч беларускіх рублёў.
Федэрацыя дала кіраўніцтву «Арсенала» два тыдні на тое, каб памірыцца з расійскімі трэнерамі. Але клуб стаў пагражаць ім крымінальнай справай.
«Кананіры» заявілі, што трэнеры падпісалі з камандай кантракты ў межах супрацоўніцтва «Арсенала» з маскоўскім «Лакаматывам». Паводле дамовы, яны павінны былі шукаць маладых гульцоў у Беларусі і Расіі, але нібыта не выканалі задачы і засталіся жыць на радзіме. У «Арсенале» заявілі, што трэнеры наносяць шкоду іміджу клуба. Таму імі зоймуцца беларускія сілавікі.